Almatyda Ermek Tursynovtyń «Shal» fılminiń jabyq kórsetilimi bolyp ótti

Fılmdi alǵashqylardyń biri bolyp elimizdiń ádebıet, mádenıet, óner, kıno salasynyń qaıratkerleri tamashalady. Fılm qazaq jáne orys tilderinde eki zalda kórsetildi.

 Fılm belgili amerıkan jazýshysy Ernest  Hemıngýeıdiń «Shal men teńiz» atty shyǵarmasynyń negizinde túsirilgen. «Biraq, bul fılm tikeleı povesti qaıtalaý emes, munda tek negizgi oıy, ıdeıasy alynǵan. Bul bizdiń Hemıngýeıdi qazaqsha túsinýimiz. Fılm qazaqtyń rýhanı,  etnıkalyq,  geografııalyq keńistigine adaptatsııa jasalynyp, qazaq dalasynda  túsirildi. Bul fılmdi biz kórermenderge adam, adamzat, adamnyń taǵdyry týraly, adam balasynyń qaırattylyǵy,  erik-jigeri týraly ıdeıalardy kórermenderge oı salý maqsatynda túsirdik. Týyndy kórermenderge túsinikti bolý úshin, qazirgi zamanǵa laıyqtalyp ekshn janrynda túsirildi.  Bul fılm kommertsııalyq kıno emes»,-dedi fılmniń tanystyrylymynda atalmysh fılm ıdeıasynyń avtory, depýtat Máýlen Áshimbaev.

 Onyń aıtýynsha, fılmniń ıdeıasy osydan eki jyl buryn dúnıege kelgen. «Men bul oıymdy aldymen Ermek Tursynovqa usyndym. Ol fılmniń stsenarıin jazyp shyqty. Stsenarıı Qazaqfılm basshysy Ermek Amanshaevtiń kóńilinen shyǵyp, qoldaý taýyp, túsirilip, mine, kórermenderge jol taýyp otyr. Onyń baǵasyn  kınosúıer qaýym keıin bere jatar. Degenmen, fılm kórermenderge úlken áser qaldyrady degen úmittemiz»,-dedi M. Áshimbaev.

 Fılmniń oqıǵa jelisi boıynsha,  bireýdiń malyn aıdap berýge kelisken aqsaqal qalyń tumanǵa tap bolyp, joldan adasyp, túrli oqıǵalardy basynan keshiredi. Barlyq basyna túsken qıyndyqtardy shydamdylyqpen, tózimdilikpen jeńip shyǵady. Fılmdegi  basty róldi belgili akter Erbolat Toǵyzaqov oınaıdy. Bul onyń alǵashqy basty róldi oınaýy.

 Atalmysh sharanyń ótýine oraı aıta ketetin jaıt, týyndy halyqaralyq festıvalderge qatysatyn bolǵandyqtan, jabyq kórsetilim retinde ótti. Fılm avtorlarynyń aıtýynsha, týyndy qalyń kópshilikke jaqyn arada jol tartpaq.