Almatyda Ermek Serkebaevqa qurmet kórsetildi
ALMATY. QazAqparat - KSRO Halyq ártisi, Sotsıalıstik Eńbek Eri Ermek Serkebaevtyń esimi máńgi este qalýy úshin Chaıkovskıı atyndaǵy Almaty mýzykalyq kolledjiniń Úlken kontsert zalyna onyń aty berildi, dep habarlaıdy QazAqparat tilshisi.
Mundaı bastamany kolledj dırektory Birjan Hasanǵalıev usynǵan.
«Ár oqý orny óziniń talantty túlekterimen maqtanady. Almaty mýzykalyq kolledjinde Quddys Qujamıarov, Álibek Dinishev, Naǵıma Esqalıeva syndy Qazaqstan mádenıetiniń damýyna úles qosqan tanymal adamdar oqyǵan. Sol túlekterdiń ishinde Ermek Serkebaevtyń orny bólek. Biz Úlken zalǵa Ermek Serkebaevtyń esimin bere otyryp, oǵan degen qurmetimizdi tanytyp qana qoımaı, jas urpaqtyń óner jolyna jaryq sham jaqtyq dep oılaımyz», - dedi Birjan Hasanǵalıev.
Úlken zalǵa Ermek Serkebaevtyń esimin berý saltanatty jıynyna KSRO halyq ártisi Bıbigúl Tólegenova, QazSSR Halyq ártisi Eskendir Hasanǵalıev jáne Ermek Serkebaevtyń aǵaıyn-týystary qatysty.
«Osy sharany uıymdastyrýshylarǵa alǵysymyz sheksiz. Ermek óz halqynyń ánshisi boldy. Bizdiń mádenı deńgeıimizdi bıikke kótergen adam. Kolledjdiń ár oqýshysy osy ǵımarat qabyrǵasynda daryndy adamdar oqyǵanyn maqtan tutady dep oılaımyn», - dedi QR Halyq ártisi Murat Serkebaev.
