Almatyda Ermahan Shaıhyulynyń «Aqqýdyń syńary» atty kitaby jaryq kórdi
ALMATY. 20 jeltoqsan. QazAqparat /Názıra Eleýhan/ - Almatyda Qazaqstan Jazýshylar jáne Jýrnalıster odaǵynyń múshesi, Balǵabek Qydyrbekuly atyndaǵy syılyqtyń eki márte ıegeri, Respýblıkalyq qoǵamdyq-saıası «Aıqyn» gazeti bas redaktorynyń orynbasary Ermahan Shaıhyulynyń «Aqqýdyń syńary» atty kitaby jaryq kórdi.
El Táýelsizdiginiń 20 jyldyq merekesine oraı «Atamura» baspasynan shyqqan jınaqqa qalamgerdiń 2004-2011 jyldar aralyǵynda «Aıqyn» gazetinde «Aqqýdyń syńary», «Jaqsynyń kózi» aıdarlary boıynsha jaryq kórgen syr-suhbattary men maqalalary toptastyrylǵan.
Alǵashqy bólimde qazaqtyń kórnekti aqyn-jazýshylary men ánshi-sazgerleriniń, sondaı-aq óner qaıratkerleriniń artynda qalǵan aıaýly jarlary ózderiniń ómirlik serigi bolǵan jubaılary týraly syr shertse, ekinshi bólimde ul-qyzdary asqar taýdaı ákeleri jaıly saǵynyshtaryn jetkizgen.
Atalmysh kitaptyń tusaýkeseri jeltoqsannyń 23-i kúni ál-Farabı atyndaǵy Qazaq ulttyq ýnıversıtetiniń T.Qojekeev atyndaǵy májilis zalynda ótetin bolady.
