Almatyda erli-zaıypty zeınetkerlerdi óltirgen kúdikti ustaldy
ALMATY. QazAqparat – Almatyda erli-zaıypty zeınetkerlerdi óltirgen kúdikti ustaldy, dep habarlaıdy QazAqparat Polisia.kz saıtyna silteme jasap.
Jaqynda 88 jáne 80 jastaǵy zeınetkerlerdiń deneleri Almaty qalasynyń Áýezov aýdanyndaǵy páterlerdiń birinen tabylǵan bolatyn. Olarmen birneshe ret habarlasa almaǵan týǵan-týystary dabyl qaǵyp, aqyrynda páter esigin buzyp kirgen. Qarttardyń ólimine pyshaq jaraqattary sebep bolǵany anyqtaldy.
«Asa aýyr qylmysty ashý úshin shuǵyl túrde tergeý-jedel toby quryldy. Uqypty jumystyń nátıjesinde kúdiktiniń jeke basy ekinshi kúni anyqtaldy jáne ol ustaldy. 1986 jyly týǵan kúdikti adam óltirgeni úshin buǵan deıin de sotty bolǵan. Eki jyl buryn túrmeden bosap shyqqan», – dedi, Almaty qalalyq Polıtsııa departamenti krımınaldyq polıtsııa basqarmasynyń bastyǵy Erkin Іńkárov.
Kúdiktiniń aıtýynsha, ol zeınetkerlerdiń úıine tonaý maqsatynda kelgen. Qarttar qarsylyq kórsetkennen keıin pyshaǵyn alyp shyqqan.
«Qazirgi ýaqytta tergeý amaldary júrgizilýde. Qazaqstan Respýblıkasy Qylmystyq is júrgizý kodeksiniń 128-babyna sáıkes kúdikti ýaqytsha ustaý ızolıatoryna qamaldy. Qylmystyń shynaıy sebepteri men basqa mán-jaılary QR QK 99-babynyń 2-bóligine sáıkes PD TB júrgizip jatqan sotqa deıingi tergeý nátıjeleri boıynsha belgili bolady. Zattaı aıǵaqtar: qylmys quraly jáne urlanǵan múlik tárkilendi», - delingen aqparatta.
