Almatyda erler áıelderin arqalaýdan jarysady
ALMATY. QazAqparat - Almatyda erler áıelderin arqalaýdan jarysady. Halyqaralyq otbasy kúnine oraı uıymdastyrylatyn erekshe jarys 15 mamyrda Saıran kóliniń jaǵasynda ótedi.
Erler kedergige toly 253 metr qashyqtyqty baǵyndyra otyryp ózderiniń jarlaryn qulatyp almaý kerek.
Baıqaý sharty boıynsha erler áıelderin arqalaı ma, kótere me ózderi biledi. Eń bastysy jarynyń aıaǵyn jerge tıgizbeı, márege birinshi kelýi kerek.
Uıymdastyrýshylardyń aıtýynsha, baıqaýǵa resmı nekede turatyn juptar ǵana qatysa alady.
«Jarysqa neke týraly kýálikti alyp kelgender qatysady. Tek áıeldiń salmaǵy 49 keliden az bolmaýy kerek. Áıtpese, qosymsha júk beriledi. Wife carrying World Championship Fınlıandııada jyl saıyn ótkizilip turady. Qazir Azııa, Afrıka elderinde de jıi uıymdastyrylady», - delingen habarlamada.
