Almatyda erkin jáne baǵdarlamamen qamtamasyz etýden chempıonat ótip jatyr
ALMATY. 9 jeltoqsan. QazAqparat /Erlik Erjanuly/ - Búgin Almatydaǵy Halyqaralyq aqparattyq tehnologııalar ýnıversıtetinde stýdentter arasynda erkin jáne ashyq baǵdarlamalyq qamtamasyz etýden chempıonat bastaldy.
Onda 3 kún boıy qatysýshylar ashyq kodpen erkin «qozǵaltqyshtarda» áleýmettik jelilerdi qurý tapsyrmasyn oryndaý boıynsha saıysqa túsedi. Ýnıversıtet rektory Damır Shynybekovtyń aıtýynsha, chempıonat eń aldymen, baǵdarlamalyq qamtamasyz etýdi ázirleý boıynsha daryndy jastardy anyqtaýǵa múmkindik beredi. Atalmysh jastar qazaqstandyq baǵdarlamalardy ázirleý arqyly elimizdiń aqparattyq derbestiginiń negizin qalaýshylar bolýy múmkin.
Jalpy Erkin baǵdarlamalyq qamtamasyz etý (EBQ) baǵdarlama kodyn shekteýsiz ornatýǵa jáne iske qosýǵa, erkin túrde paıdalanýǵa jáne zertteýge, taratýǵa jáne ózgertýge múmkindik beredi. EQB eń kóp taraǵan Apache veb-serveri men áıgili Vıkıpedııanyń negizin qalǵan. Eýropadaǵy kóptegen memlekettik mekemeler búgingi tańda EBQ-ǵa kóshken, ózgeleriniń de kóshý nıeti bar. Qytaı, Úndistan sııaqty memleketter de EBQ-ǵa kóshýde. Erkin baǵdarlamalyq qamtamasyz etýdi kez-kelgen kompıýterge erkin túrde ornatýǵa jáne paıdalanýǵa bolady. Mundaı BQ barlyq jerlerde: mektepter, keńseler, JOO, derbes kompıýterler jáne barlyq kommertsııalyq emes jáne memlekettik uıymdar men mekemelerde erkin qoldanysqa ıe.
«Elimizde EBQ paıdalaný tájirıbesin engizý otandyq ІT-salasyn básekege qabiletti etedi. Sondaı-aq, bıýdjettik qarajatty únemdeýge oń yqpalyn tıgizedi. Kodtardyń ázirleýshiler úshin ashyq jáne qoljetimdi bolýy aqparattyq qaýipsizdikti, aqparattyq ónimderdiń sapasyn arttyrýǵa, ınnovatsııalardy damytýǵa jáne elimizde menshikti BQ paıda bolýyn qamtamasyz etedi», - deıdi «Zerde» ulttyq ınfokommýnıkatsııa holdıngi» AQ basqarma tóraǵasynyń orynbasary Bıkesh Qurmanǵalıeva.
