Almatyda erekshe jaǵdaıdy qajet etetin adamdar úshin kınozal ashyldy
ALMATY. QazAqparat - Almatyda Qazaqstan boıynsha alǵash ret aýtızmi bar adamdarǵa yńǵaılanǵan kınozal ashyldy. Kınozalda Disney-diń «Moana» anımatsııalyq fılmi kórsetildi, dep habarlaıdy QazAqparat.
Atalmysh jobany Disney kompanııasy Reseı men TMD kóleminde Chaplin Cinemas kınoteatrlar jelisimen birlesip, «Bolashaq» korporatıvtik qorynyń qoldaýymen j.zege asyrdy. Kınotetarda kórsetiletin fılmderdiń barlyǵy qabyldaý múmkindigi erekshe adamdarǵa beıimdelgen. Jobanyń maqsaty múmkindigi erekshe jandardy áleýmettik ortaǵa beıimdeý.
«Kınofılmderdiń barlyǵy aýtızmi bar adamdarǵa beıimdelgen. Basqasha aıtqanda kórsetiletin týyndylarda dybys tunshyqtyrylyp, jarqyn túster de álsiz etip beriledi. Zal qarańǵy bolyp turady. Seans júrip jatqanda zaldyń esikteri jabylmaıdy jáne onda arnaıy sensorlyq qurylǵylar ornatylady»,-deıdi «Bolashaq» korporatıvti qorynyń dırektory Dınara Sháıjúnisova.
Sonymen qatar kórermender munda emin-erkin syrtqa shyǵyp, arnaıy jumsaq oryndyqtarda demala alady. Buǵan qosa olarǵa fılmdi osy demalys aýmaǵynan da tamashalaý múmkindigi jasalǵan. Kınoteatr qyzmetkerleri qabyldaý múmkindigi erekshe adamdarmen qarym-qatynasty biledi. «Bolashaq» korporatıvti qory qaıyrymdylyq qarjysyna Qazaqstannyń 9 qalasynda 20 ınklıýzıvti qoldaý kabınetterin ashyp, densaýlyq saqtaý men bilim berý salasy boıynsha 800 mamandy daıyndap úlgerdi. Sondaı-aq jyl basynan beri qor tarapynan 4 beıimdelgen kórsetilim uıymdastyryldy.
Chaplin Cinemas kınotetarlar jelisiniń bas dırektory Baqytjan Musataevtyń sózinshe, kınoteatrlar jelisi óziniń kınozaldarynda erekshe jaǵdaıdy qajet etetin balalar men ózge de balalardyń basyn biriktirýdi kózdeıdi.
«Biz búgin Disney kompanııasymen birigip, osy baǵyttaǵy alǵashqy qadamdarymyzdy jasap otyrǵanymyzǵa qaýnashtymyz»,-dedi B.Musataev.
