Almatyda erekshe poezııa keshi bolady
ALMATY. 10 mamyr. QazAqparat - Almatyda erteń, 11 mamyr kúni Ádebıetshiler úıinde poezııa keshi ótedi.
Bul joly aqyndar óz óleńderin oqyp qana qoımaı, oqyrmandaryna basqa da shyǵarmashylyq qyrlarymen kórinbek. Budan buryn keshtiń ajaryn ashyp, ánmen kómkerý úshin negizinen belgili estrada juldyzdary men dástúrli án óneriniń maıtalmandary arnaıy shaqyrylatyn. Alaıda qazaqtyń qara óleńin tórge ozdyratyn bul sharaǵa qatysatyn aǵa býyn men keıingi jas býyn qalam ıeleriniń arasynda ánshilermen talasqa túse alatyn talanttary da az emes. Oǵan Jaras Sársek, Maraltaı Raıymbekuly, Baqyt Bedelhan syndy aqyndardy mysalǵa keltirýge bolady. Olardyń dombyramen áýelete án shyrqap, kúmbirlete kúı tógetin ónerlerin qarapaıym oqyrman bile bermeıdi. Sol sııaqty ózge de qazaq aqyndarynyń arasynda kúıshi, bıshi, sýretshi sekildi óner ıeleri jetkilikti.
