Almatyda erekshe qamqorlyqty qajet etetin balalar úshin jańa ortalyq ashyldy
ASTANA. QazAqparat - Almaty ákimi Baýyrjan Baıbek erekshe qamqorlyqty qajet etetin balalarǵa arnalǵan №7 psıhologııalyq- pedagogıkalyq korrektsııaly jańa kabınettiń ashylýyna qatysyp, onyń jumysymen tanysty, dep habarlaıdy QazAqparat Almaty qalasy ákimdiginiń baspasóz qyzmetine silteme jasap.
Alataý aýdanyndaǵy Oqýshylar úıiniń ǵımaratynda ashylǵan bul Ortalyq qalalyq Bilim basqarmasy men «Bolashaq» qaıyrymdylyq qorynyń birigip jumys isteýi arqasynda júzege asty.
Búgingi tańda megapolıste erekshe qamqorlyqty qajet etetin 7 myńnan astam bala turady. Sońǵy 9 aı ishinde 877 bala psıhologııalyq -pedagogıkalyq túzeý qyzmeti kórsetildi. Osyndaı kabınetterde 5 588 balaǵa tıisti keńes berildi.
Jańa ortalyqta jylyna 180 bala ońalýdan ótedi. Ár balamen jáne túrli toptarmen arnaıy mamandar tikeleı jumys isteıdi. Kózinde, qulaǵynda, qımylynda, sóıleýinde, damýynda múkis bar baldyrǵandardyń erekshe qamqorlyqqa zárý ekendigi anyq. Osy rette mundaı ortalyqtardaǵy arnaıy mamandar balanyń durys ósip- jetilýine kásibı kómek kórsetilýde.
«Bolashaq» qaıyrymdylyq qorynyń basshysy Dınara Shaıjúnisova óziniń sózinde bolashaqshylardyń «Ár bala mektepke barýǵa laıyq» jobasy aıasynda 2016 jyly dúnıege kelgen ekinshi psıhologııalyq -pedagogıkalyq korrektsııa kabıneti ekendigin, múmkindigi shekteýli balalar úshin munda barlyq jaǵdaıdyń jasalǵandyǵyn aıtty.
«Korrektsııa kabınetteriniń jumysy arnaıy mektepke deıingi balalar mekemelerine barmaıtyn, múmkindigi shekteýli balalar úshin óte tıimdi jáne baldyrǵandardyń damýy úshin barlyq jaǵdaılar jasalǵan», - dep atap ótti Shaıjúnisova.
Ortalyq ońaltýǵa qajetti zamanaýı qondyrǵylarmen tolyq jabdyqtalǵan, emdeý, dene shynyqtyrý, Montessorıı kabınetteri, mýzyka yrǵaǵy zaly, sensorly bólme, oıyn aımaǵy, logoped, defektolog, psıholog, ádistemeshi kabınetteri jumys isteıdi. Munda kedergisiz orta da bar, dálizder keń, al aqparattyq taqtalar Braıl shrıftimen toltyrylǵan.
