Almatyda «Er -Tóstik» atty birinshi qazaq balalar baletiniń premerasy boldy
ALMATY. 20 jeltoqsan. QazAqparat /Názıra Eleýhan/ - Almatyda demalys kúni Aleksandr Seleznov atyndaǵy horeografııalyq ýchılışe janyndaǵy «Órleý» jas balet ártisteriniń teatrynda,
QR Mádenıet mınıstrliginiń qoldaýymen «Er -Tóstik» atty birinshi qazaq balalar baletiniń premerasy bolyp ótti.
Tuńǵysh ret balet sahnasynyń tórine shyqqan halyq aýyz ádebıetiniń kóne úlgisin jas horeograf, baletmeıster Gúlnár Adamova sahnalady. Baletke mýzykany Dúısenbek Naqypovtyń ádebı lıbrettosy boıynsha elimizdiń tanymal sazgeri Beıbit Dáldenbaı jazǵan. Halyq ertegisi «Er Tóstiktiń» oqıǵasy jelisimen órilgen, tórt bólimdi balet qoıylymyna 100-den astam bıshi qatysty. Bıshilerdiń barlyǵy atalmysh ýchılışe oqýshylary. Basty rol - Er Tóstikti atalmysh oqý ornynyń sońǵy kýrsynda oqıtyn talantty jas Serik Naqysbek somdady.
Aleksandr Seleznev atyndaǵy horeografııalyq ýchılışesiniń dırektory Qarlyǵash Myrzahanovanyń aıtýynsha, jas ártister qoıylymdy bir aıdyń ishinde daıyndaǵan. «Bul - úlken rekordty kórsetkish, balalardyń erligi. Qoıylymǵa qatysqan barlyq ártister bizdiń oqý ornynyń eń úzdik oqýshylary. Tuńǵysh ret sahnalanyp otyrǵan «Er Tóstik» qoıylymy - «Órleý» jas balet ártisteriniń alǵashqy týyndysy. Tuńǵysh týyndy retinde jáne bizdiń ýchılışe tarıhyndaǵy da búgingi kún - eń aıtýly oqıǵa bolǵaly otyr. Bul bastama elimizdegi balalar baletiniń damýyna yqpal etedi dep oılaımyn. Bul premera sonymen qatar, esep berýimiz ispettes, qorytyndy jyldyq jumysymyz. Biz bıshilerimizdiń qabiletin ushtaı otyra, jas óskinderdi halqymyzdyń rýhanı qundylyqtarymen sýsyndatyp ósirýge ózindik úles qosqymyz keledi», dedi ol.
Onyń aıtýynsha, qoıylymǵa jańa mýzyka jazylyp, ártisterge jańa kıimder tigilgen.
Jaǵymsyz keıipkerlermen kúresip, zulymdyq ataýlyny qaısar qaıtpas minezimen jeńip, ádildikti ornatqan Er Tóstik batyrdyń beınesi qulaqqa jaǵymdy áýez ben myń buralǵan bı arqyly ádemi somdaldy. Qoıylymnyń alǵashqy kórermenderi qyzyqqa toly týyndyny yqylaspen tamashalady.
