Almatyda er adamnyń qolyndaǵy belgisiz zat jaryldy
ALMATY. QazAqparat - Almatyda 33 jastaǵy er adam jarylǵysh zattan zardap shekti, dep habarlaıdy QazAqparat tilshisi.
Aldyn ala belgili bolǵandaı, 33 jastaǵy jigit tańǵy 7:21-de aýrýhanaǵa jetkizildi.
Túsken kezde oǵan qosarlanǵan jaraqat, bas súıegi men mıy shaıqalǵan degen dıagnoz qoıyldy.
«Jarylys saldarynan onyń oń qoly men súıekteri jaraqattanǵan. Basy men keýdesin, moınyn 2-3 dárejeli kúıik shalyp, 2-dárejeli shok alǵan. Denesiniń 10 paıyzyn kúıik shalǵan», - dedi №4 qalalyq aýrýhananyń jaraqat bóliminiń meńgerýshisi Dáýren Túsipov.
Dárigerler patsıenttiń qolyna shuǵyl túrde ota jasalǵandyǵyn jetkizdi.
«Qazir patsıenttiń jaǵdaıy aýyr. Qarqyndy terapııa bóliminde em qabyldap jatyr. Shokqa qarsy terapııa júrgizilýde», - dedi D.Túsipov.
Poltsııa oqys oqıǵa týraly keıin aqparat beretindigin habarlady.
