Almatyda er adamdy jaqyndary 1 aıdan beri izdep tappaı jatyr
ALMATY. QazAqparat - Almatyda 50 jastaǵy er adamdy jaqyndary 1 aıdan beri izdep tappaı jatyr, dep habarlaıdy QazAqparat.
Marat Býrýmkýlov 14 shilde kúni Taýly qyrat aýylyndaǵy úıinen shyǵyp ketken. Ústinde sur kúrteshe, qara djınsy bolǵan, aıaǵynda jazdyq mokasıny bolǵan. Sodan beri odan habar joq.
Ápkesi Galına Býrýmkýlovanyń aıtýynsha, er adam 30 jyldan beri psıhologııalyq dıspanserde esepte tur.
«Áskerde Stavropol aımaǵynda orystarmen tóbeles kezinde basynan qatty soqqy alyp, sodan aqyl-esi kem bop qaldy. Mine 30 jyl boldy aýyrǵanyna», - dedi ápkesi.
Jaqyndary Maratty bireýler quldyqqa alyp ketýi ábden múmkin dep qaýiptenip otyr.
Olar Marattyń «Ońaı» kartasy arqyly qaıda barǵanyn tekserip kórgen.
«Seıfýllın kóshesiniń boıynda er adamdar qara jumys izdep turatyn jerde bolǵan. Sol jerdegi kameralardy teksere kele beınejazbadan ony bireý jetektep bara jatqany anyq kórindi. Ol kishkene bala sııaqty ǵoı, tur deseń turady, otyr deseń otyrady. Bireý ańqaýlyǵyn paıdalanyp, quldyqqa alyp ketti me dep qorqamyz. Meniń inim óte jas kórinedi. Kórgen adam 50 jasta dep oılamaıdy», - dedi Galına Býrýmkýlova.
Qazir Marat Býrýmkýlovtyń izdeýmen Medeý aýdandyq ІІD aınalysyp jatyr.
