Almatyda er adam óziniń tanysyn qasaqana órtep jiberdi
ALMATY. QazAqparat - Almatyda óziniń tanysyn qasaqana órtep, janyp ketkenshe esikti ashpaı qoıǵan er adam sottaldy. Bul týraly qalalyq sottyń baspasóz hatshysy Dıas Mahambetov aıtty, dep habarlaıdy QazAqparat.
Sot materıaldaryna sáıkes, er adam óziniń tanysymen birge dúkende jumys jasaǵan. Keıin ekeýi janjaldasyp qalady. Kektengen er adam tanysyn uıyqtap jatqan jerinen betine suıyq hımııalyq zat shashyp, ot qoıǵan. Sosyn esikti syrtynan bekitip ashpaı qoıǵan. Oqıǵa saldarynan órtengen jigit opat boldy.
«Almaty qylmystyq ister boıynsha mamandandyrylǵan aýdanaralyq soty sottalýshyny QR QK 99-babynyń 2-bólimi boıynsha aıypty dep taýyp, 15 jylǵa bas bostandyǵynan aıyrdy. Sot úkimi áli kúshine engen joq», - dedi D.Mahambetov.
