Almatyda er adam kópqabatty úıdiń shatyrynan sekirmek boldy
ALMATY. QazAqparat- Almatynyń patrýldik polıtsııa qyzmetkerleri óz-ózine qol salmaq bolǵan azamatty qutqaryp qaldy, dep habarlaıdy QazAqparat tilshisi.
Almaty qalalyq polıtsııa departamentiniń baspasóz qyzmeti málim etkendeı, Naýryzbaı aýdandyq polıtsııa basqarmasynyń kezekshi bólimine belgisiz er adam tórt qabatty úıdiń shatyrynda óz-ózine qol jumsamaq bolǵany týraly habarlama kelip tústi.
Býran-263 patrýldik ekıpajy birneshe mınýtta oqıǵa ornynda boldy.
«Belgili bolǵandaı, jergilikti turǵyn mas kúıinde áıelimen janjaldasyp qalǵan, sol sebepti ol aldymen ózine pyshaq salmaq bolǵan. Qannan qoryqqan ol qaraýsyz qalǵan ǵımaratqa baryp, shatyrdan sekirýge bel býǵan»,- dep habarlady vedomstvodan.
Oqıǵa ornyna jetken dárigerler er adamǵa alǵashqy medıtsınalyq kómek kórsetip, jaqyn mańdaǵy aýrýhanaǵa alyp ketti.
«Іs materıaldary jergilikti ýchaskelik ınspektorǵa tapsyryldy, ol birinshi kezekte er adamnyń otbasylyq-turmystyq jaǵdaıyn tekserip, ózin-ózi óltirýge ıtermelegen mán-jaılardy anyqtaıdy»,- dep atap ótti polıtsııa ókilderi.
