Almatyda er adam qoldan ishimdik jasap satqan
ALMATY. QazAqparat - Almatyda er adam alkogoldik ishimdikterdi qoldan jasap satqan, dep habarlaıdy QazAqparat tilshisi.
Qalalyq Memlekettik kirister departamentiniń baspasóz qyzmeti habarlaǵandaı, jedel izdestirý barysynda MKD ekonomıkalyq tekserý qyzmetiniń mamandary Alataý aýdanyndaǵy úılerdiń aýlasyndaǵy astyrtyn tsehti áshkereledi. Er adam spırt pen sýdy aralastyryp, belgili ishimdik óniminiń bótelkelerine quıyp kelgen.
Tekserý barysynda 5 belgili marka óniminiń eseptik baqylaý markalary japsyrylǵan 1350 bótelke, 1500 eseptik baqylaý markasy, staqandar tabyldy.
Atalǵan derek boıynsha QR QK 233-babynyń 2-bólimimen qylmystyq is qozǵaldy.
Qalalyq Memlekettik kirister departamenti alkogoldik ishimdikterdi satyp alǵan kezde mindetti túrde chek talap etýdi eskertedi.
