Almatyda er adam HQO qyzmetkeriniń murnyn syndyrdy
ALMATY. QazAqparat – Almatyda HQO qyzmetkerin klıent soqqyǵa jyqty. Bul týraly «Azamattarǵa arnalǵan úkimet» AQ qoǵammen baılanys departamentiniń dırektory Murat Jumanbaı málimdedi, dep habarlaıdy QazAqparat tilshisi.
Onyń aıtýynsha, osyndaı eki derek tirkelgen.
Daý janjaldyń biri Almaly aýdandyq HQO-da bolǵan.
«Almaly aýdandyq HQO-ǵa mekenjaı anyqtamasyn alýǵa er adam kelgen. Ol óziniń kámelettik jasqa tolǵan qyzyna anyqtama alý úshin kómekke júgingen. Biraq ol úshin klıent óziniń jáne qyzynyń jeke kýáligin, týý týraly kýáligin kórsetýi tıis bolǵan. Alaıda qyzynyń týý týraly kýáligi qolynda bolmaı shyqty. Qyzmetkerler oǵan qyzmet kórsetýge zań boıynsha tyıym salynǵanyn aıtyp, bas tartqan. Soǵan jaýap retinde ol qyzmetkerdi bir uryp, murnyn syndyrǵan», - dedi Murat Jumanbaı.
Osyǵan uqsas jaǵdaı Áýezov aýdanynda da bolǵan. Aýdandyq HQO ataýly áleýmettik kómek rásimdeý úshin bir áıel kelgen. Ol úshin arnaıy anyqtamany egov.kz portaly arqyly shyǵaryp alý kerek bolǵan. Óz-ózine qyzmet kórsetý sektorynda qujatty shyǵara almaǵan áıel keńesshiden kómek suraıdy. Keńesshi kómektesse de qujat portalda uzaq óńdelip qalǵan. Sol kezde áıel aıǵaılap, qyzmetkerge qol kótergen.
Eki jaǵdaıda da polıtsııa shaqyryldy. Bul ister boıynsha materıaldar aýdandyq Polıtsııa basqarmalarynyń qaraýynda jatyr.
Aıta ketý kerek, búgin Almatyda naýqastyń týystary jansaqtaý bólimshesiniń medıtsınalyq qyzmetkerlerin uryp-soqqanyn habarlaǵan bolatynbyz.
Oqys oqıǵa Almatydaǵy №7 qalalyq klınıkalyq aýrýhananyń jansaqtaý bólimshesinde boldy.
Olar ózderin týysy jatqan reanımatsııa bólimshesine kirgizbegeni úshin medbıkelerdi uryp-soqqan.
