Almatyda er adam áıeliniń shashynan súırep, soqqyǵa jyqty
ALMATY. QazAqparat - Almatyda er adam kósheniń ortasynda áıeliniń shashynan súırep, soqqyǵa jyqty, dep habarlaıdy QazAqparat tilshisi.
Erli-zaıyptylar arasyndaǵy tóbeles áleýmettik jelide tarady.
Qalalyq polıtsııa deparatamentiniń málimetinshe, oqıǵa 8 shilde kúni «Dýman» yqshamaýdanynda bolǵan.
Tártip saqshylary ony áleýmettik jelige monıtorıng jasaý kezinde anyqtady. Belgili bolǵandaı, jábirlenýshi 1979 jyly týǵan, al ony soqqyǵa jyqqan kúıeýi 1974 jylǵy.
«Atalǵan fakti boıynsha ýchaskelik ınspektorlar oqıǵa ornynda tekserý júrgizdi. Áıel kúıeýiniń ústinen aryz jazdy. Oǵan sot-medıtsınalyq saraptamadan ótýge joldama berildi. Er adamdy jaýapqa tartý máselesi saraptama qorytyndysy shyqqan soń qaralady», - deıdi Medeý aýdandyq polıtsııa basqarmasynyń bastyǵy Dáýren Ótebaev.
Sonymen qatar er adam apta saıyn áıelderdi zorlyq-zombylyqtan qorǵaý jónindegi ınspektorǵa profılaktıkalyq áńgime júrgizý úshin kelýge mindetteldi.
