Almatyda er adam avtobýstyń áınegin syndyrdy
ALMATY. QazAqparat - Almatyda qoǵamdyq kólik júrgizýshisimen janjaldasqan er adam kóliktiń áınegin syndyrdy, dep habarlaıdy QazAqparat tilshisi. № 86 avtobýsta bolǵan oqys oqıǵanyń vıdeosy Vkontakte jelisinde jarııalandy.
Beınekadrdan belgili bolǵandaı, er adam avtobýs júrgizýshisimen sózge kelip qalǵan. Kýágerlerdiń aıtýynsha, er adam júrgizýshi otyrǵan kabınanyń áınegin syndyryp, judyryq ala júgirgen.
Avtobýs júrgizýshisin soqqyǵa jyqpaq bolǵan. Belgili bolǵandaı, ekeýi de bir-birine bylapyt sóz aıtqan. Er adam sabyrǵa shaqyrǵan jolaýshylardyń sózin qulaǵyna da ilmegen.
Atalǵan oqıǵaǵa baılanysty «Almatyelektrotrans» JShS jetekshisi Rızvan Tsınaev túsinikteme berdi.
«Bul derek Túrksib aýdandyq Іshki Іster basqarmasyna berildi. Polıtsııa qazir tekserip jatyr», - dedi «Almaty elektrotrans» JShS dırektory Rızvan Tsınaev.
