Almatyda epılepsııanyń aýyr túrine shaldyqqan bes balaǵa operatsııa jasaldy
Aýrýhananyń baspasóz qyzmeti málim etkendeı, 2023 jyldyń 13 qańtary men 16 qańtary aralyǵynda №2 qalalyq klınıkalyq balalar aýrýhanasynda álemge áıgili neırohırýrg, germanııalyq professor Ýlrıh Tomaleniń qatysýymen balalar neırohırýrgııasy boıynsha «Dárige tózimdi epılepsııamen aýyratyn balalardaǵy az ınvazıvti fýnktsıonaldy gemısferotomııa» atty biregeı sheberlik sabaǵy ótti.
Sonyń aıasynda nemis mamany jetekshi qazaqstandyq neırohırýrgtermen birlesip epılepsııanyń kúrdeli túrine bes ota jasady.
«Bizdiń bes kishkentaı balamyzǵa ota jasaldy. Berlındegi «Sharıte» klınıkasynan kelgen qonaǵymyz, professor Tamaleniń jetekshiligimen master-klass barysynda epılepsııamen aýyratyn balalarǵa kúrdeli operatsııalar júrgizildi. Barlyq operatsııa sátti ótti, balalar qazir neırohırýrgııa bólimshesinde jatyr. Budan bylaı mundaı balalarǵa óz betimizshe operatsııa jasaımyz dep oılaımyn»,- dedi №2 qalalyq klınıkalyq balalar aýrýhanasynyń bas dárigeri Marat Rabandııarov.
Sońǵy jyldary epılepsııa hırýrgııasy boıynsha jańa tehnologııalar engizilýde. Olar buryn mundaı emdelý múmkin bolmaǵan naýqastardyń saýyǵyp ketýine múmkindik beredi.
Professor atap ótkendeı, mıkrohırýrgııalyq az ınvazıvti ádistemeni qoldaný boıynsha osy hırýrgııalyq aralasýlar kezinde kompıýterlik assıstentsııa mindetti túrde qoldanylady.
«Berlınde biz ózimiz bul ádisti «3D-shyndyq» neıronavıgatsııalyq júıesi arqyly engizýdi jaqynda ǵana bastadyq. Bul zamanaýı tehnologııa osy qazaqstandyq klınıkada paıda bolǵandyqtan, biz osy ádisti Qazaqstanda birge engizýdi uıǵardyq. Aıta ketý kerek, balalar aýrýhanasynyń operatsııalyq bólmesi joǵary deńgeıli, zamanaýı medıtsınalyq tehnıkamen jabdyqtalǵan. Ári qaraı únemi damyp, tehnıkany da, jańa ádisterdi de jetildirý óte mańyzdy», - dedi nemis dárigeri.
Aıta keteıik, ota mindetti áleýmettik medıtsınalyq saqtandyrý aıasynda tegin jasaldy.
Esterińizge sala keteıik, Qazaqstanda 18 jasqa deıingi balalar MÁMS júıesinde memleket tarapynan saqtandyrylǵan.