Almatyda epıdemıologııalyq jaǵdaı jaqsardy ma

ALMATY. QazAqparat -Almaty qalasynyń sanıtarııalyq-epıdemıologııalyq baqylaý departamentiniń basshysy, qalanyń bas memlekettik sanıtar dárigeri Jandarbek Bekshın megapolıstegi epıdemıologııalyq ahýal týraly aıtty, dep habarlaıdy QazAqparat tilshisi.

«Jyl basynan beri Almatyda koronavırýs juqtyrýdyń 156 myń jaǵdaıy tirkeldi. Sońǵy táýlikte 309 adam vırýs juqtyrdy. Delta shtamy shyqqanda kúnine 1700-ge deıin jaǵdaı tirkeletin, qazir - táýligine 300-350. Koronavırýstyń taralýy bazalyq boljamǵa sáıkes ınfektsııalardyń tómendeý dınamıkasynda turaqtanýdy jalǵastyryp jatyr»,- deıdi ol.

Spıkerdiń aıtýynsha, syrqattaný kórsetkishi 100 myń turǵynǵa shaqqanda 121-den 113-ke deıin tómendedi. Al táýlik ósimi 0,22-den 0,18-ge azaıdy.

«Infektsııalyq berilý ındeksi 0,9 deńgeıinde saqtalyp otyr. Qazirgi tańda qalada ımmýndaý kórsetkishi - 54 paıyz. Qalada vırýs juqtyrǵandardyń eń kóbi - 20-39 jastaǵylar»,- dedi Jandarbek Bekshın brıfıngte.