Almatyda epıdemıologııalyq jaǵdaı kúrt nasharlady – Qarlyǵash Ádbijabbarova

ALMATY. QazAqparat – Almatyda koronavırýs ınfektsııasyn juqtyrǵandardyń sany kóbeıip keledi. Bul týraly onlaın brıfıng barysynda Almaty qalasy boıynsha taýarlar men qyzmetterdiń sapasy men qaýipsizdigin baqylaý departamentiniń basshysy Qarlyǵash Ádbijabbarova aıtty, dep habarlaıdy QazAqparat tilshisi.

«Almaty qalasynda KVI boıynsha epıdemıologııalyq jaǵdaı kúrt nasharlady, QR boıynsha epıdemıologııalyq jaǵdaıdy baǵalaý matrıtsasynda qala úshinshi kún «qyzyl» aımaqta ornalasqan. Aptalyq syrqattanýshylyq 100 myń turǵynǵa shaqqanda 2,2 ese ósti»,- deıdi spıker.

Onyń aıtýynsha, epıdemııanyń taǵy bir tolqyny jańa jyldyq merekeler men belgili oqıǵalardan keıin jáne «omıkron» shtammyna baılanysty bolyp otyr.

Bul zerthanalyq túrde bıylǵy jyldyń 6 qańtardaǵy tolyq genomdyq sekvenırleý nátıjelerimen rastalady.

«QR DSM-de 96 synamadan 8 synamada omıkron shtammy anyqtaldy, onyń ishinde 7 synama Almaty qalasynan boldy. «Delta» shtammdary synamalardyń 71% - ynda anyqtaldy, «delta – plıýs» - 16% - da, basqa shtammdar - 4,7% paıyz.

«Omıkron» shtammyna tán Almaty qalasyndaǵy epıdemıologııalyq protsestiń erekshelikteri - asa joǵary juqpalylyǵy (taralý koeffıtsıenti 1:5), ımmýnıtetke tótep berý qabileti, qaıta juqtyrý qaýpiniń joǵarylaýy jáne 20-30 jas aralyǵyndaǵy azamattardyń zaqymdanýy baıqalady» - deıdi ol.

Sonymen qatar, ol apta saıynǵy syrqattanýshylyq buryn KVI-men aýyryp saýyqqan adamdardyń qaıta juqtyrý jaǵdaılary kúrt óskenin aıtty.