Almatyda epıdemıologııalyq ahýal turaqty

ALMATY. QazAqparat- Qalada epıd-ahýal turaqty. Aı basynan beri koronavırýsqa shaldyqqandar sany aıtarlyqtaı azaıǵan. Dese de, bosańsýǵa áli erte. Shahardaǵy osy jaǵdaıdy saqtap qalý úshin talap etiletin barlyq saqtyq sharalaryn ustaný kerek.

Bul týraly Almatynyń bas sanıtarlyq dárigeri Jandarbek Bekshın aıtty, dep habarlaıdy QazAqparat tilshisi.

Jandarbek Bekshın qazirgi ýaqytta Almaty qalasynda KVI boıynsha epıdemıologııalyq ahýal turaqty ekenin rastady.

«Kúnine ınfektsııanyń 30-35 jaǵdaıy tirkeledi, biraq bul bosańsýǵa sebep emes. Koronavırýstyń jańa shtamy «omıkron» búkil álemde tez taralady jáne álemniń 106 elinde, tipti ujymdyq ımmýnıtettiń joǵary deńgeıi tirkelgen jerde de anyqtaldy. Jańa nusqadan tolyq qorǵaý úshin vaktsınatsııanyń tolyq kýrsy qajet. Revaktsınatsııa da usynylady»,- dedi Jandarbek .

Jańa jyldyq merekelerdiń jaqyndaýyna baılanysty Jandarbek Bekshın adamdar kóp jınalatyn oryndarǵa barmaýǵa keńes berdi

«Mereke qarsańynda adamdar kóp jınalatyn banketterge barmaýǵa keńes beremin. Merekeni otbasymen birge atap ótýge bolady. Jańa jyldyq merekeler koronavırýstyń taralýyna sebep bolmaýy kerek»,- deıdi ol.