Almatyda epıdemıologııalyq ahýal nasharlap barady - departament

ALMATY. QazAqparat – Almatyda koronavırýs juqtyrǵan naýqastardyń sany ósýde. Bul týraly Almaty qalasynyń sanıtarlyq-epıdemıologııalyq baqylaý departamenti málim etti, dep habarlaıdy QazAqparat tilshisi.

«Almatyda epıdemıologııalyq ahýal nasharlap barady. Pandemııa bastalǵaly beri megapolıste koronavırýs ınfektsııanyń 39 655 jaǵdaıy tirkeldi (100 myń turǵynǵa shaqqanda 1 948,9). Jyl basynan beri 21134 adam indet juqtyrdy (100 myń turǵynǵa shaqqanda 1 038,7), naýryzda - 9 525 jaǵdaı tikelse, 8 sáýirde - 5 057 adamnan indet shyqty. Ótken táýlikte 717 almatalyqtan koronavırýs ınfektsııasy tabyldy. Kúndelikti ósim 1,8 qurady», - dep atap ótti departamenttiń baspasóz qyzmeti.

Epıdemıologtardyń aıtýynsha, qazirgi ýaqytta koronavırýstyń úshinshi tolqyny jalǵasýda. Bul mýtatsııalanǵan shtamdarǵa baılanysty bolyp otyr.

«1 jasqa deıingi balalar arasynda KVI aýrýynyń ósýi jalǵasýda, qazirgi tańda aptasyna 64 jaǵdaıǵa deıin jetti: naýryzdyń 1-shi aptasy-12 jaǵdaı (KVI – nyń ádettegi aǵymy), 2-shi aptada – 27 jaǵdaı (mýtatsııalanǵan shtammdardy tirkeýdiń bastalýy), 3-shi aptada – 41 jaǵdaı, 4-shi aptada – 54 jaǵdaı, sáýirdiń 1-shi aptasynda -64 jaǵdaı, ıaǵnı 1 jasqa deıingi balalar arasynda KVI jaǵdaılarynyń aptalyq tirkelýi mýtatsııalanǵan KVI shtammdarynyń taralýyna qaraǵanda 5,3 ese; 14 jasqa deıingi balalar arasynda – 107 jaǵdaıdan 372 jaǵdaıǵa deıin, ıaǵnı 3,5 esege ósti»,- dep habarlady departamentten.