Almatyda epıdemıologııalyq ahýal nasharlap barady - departament
ALMATY. QazAqparat – Almatyda koronavırýs juqtyrǵan naýqastardyń sany ósýde. Bul týraly Almaty qalasynyń sanıtarlyq-epıdemıologııalyq baqylaý departamenti málim etti, dep habarlaıdy QazAqparat tilshisi.
Qalada sanıtarlyq-epıdemıologııalyq ahýal JRVI men tumaýdyń maýsymdyq ýshyǵýy saldarynan kúrdelene túsýde. Ótken jyldyń osy kezeńimen salystyrǵanda jedel respıratorlyq vırýstyq ınfektsııany juqtyrǵan naýqastar sany 2,2 esege ósken.
Halyqtyń barlyq jastaǵy toptarynyń KVI aýrýyna shaldyǵý deńgeıiniń artýy erekshe alańdaýshylyq týǵyzýda. 22 qazannan bastap naýqastar sany kóbeıgen. Tek sońǵy táýlikte turǵyndar arasynda KVI juqtyrǵandardyń 77 oqıǵasy tirkelgen.
Adamdar kóp shoǵyrlanǵan oryndarda KVI juqtyrý saldarynan qoǵamda epıdemııalyq protsesster órshýde. Júrgizilgen epıdemıologııalyq saraptamalar nátıjesinde ınfektsııanyń 53% -y qoǵamdyq kólikte, 23% -y úı jaǵdaıynda, 17% -y qoǵamdyq oryndarda juǵatyndyǵy anyqtaldy.
Sondyqtan Almatynyń sanıtarlyq-epıdemıologııalyq qyzmeti qala turǵyndaryna profılaktıkalyq sharalardy saqtaýdy usynady. Birinshiden, adamdar kóp jınalatyn oryndardan, ásirese 65-ten asqan adamdardyń aýlaq bolǵany jón. Ekinshiden, maska taǵyp, qoǵamdyq oryndarda, dúkenderde, dárihanalarda jáne taǵy da basqa jerlerde áleýmettik araqashyqtyqty saqtaý qajet.
«JRVI belgileri baıqalsa úıden shyqpaı, dárigerdi úıge shaqyrý kerek. Ózińizdi ózińiz emdemeńiz, balalardy jáne egde jastaǵy otbasy múshelerin jeke bólmede oqshaýlap, janashyr bolyńyz»,– delingen ákimdik taratqan habarlamada.
