Almatyda epıdemıologııalyq ahýal máselesi týraly keńes ótti
ALLMATY. QazAqparat - Búgin Almaty qalasynda QR Premer-Mınıstriniń orynbasary Eraly Toǵjanovtyń tóraǵalyǵymen epıdemıologııalyq ahýal máselesi týraly keńes ótti, dep habarlaıdy QazAqparat.
Keńeske Almaty qalasynda ornalasqan qalalyq jáne respýblıkalyq medıtsınalyq uıymdardyń basshylary qatysty. Negizgi máseleler COVID-19-ben kúresýge jáne densaýlyq saqtaý júıesin damytýǵa qatysty boldy. QR Bas memlekettik sanıtarlyq dárigeri Erlan Qııasov aǵymdaǵy epıdemıologııalyq ahýal men jumystyń basym baǵyttary týraly túsinik berdi.
Almaty qalasy ákiminiń orynbasary Erjan Babaqumarov qazirgi kezde jumystyń basty baǵyty koronavırýs ınfektsııasynynyń taralýyn tejeý jónindegi is-sharalar bolyp qalatynyn baıandady. Búgingi tańda qalada KVI boıynsha epıdemıologııalyq ahýal turaqty, qala «sary aımaqta». Derttiń tómendeýi ujymdyq ımmýnıtettiń 55%-y deńgeıinde qalyptasýyna, halyqty vaktsınalaýmen qamtýdyń ósýine (birinshi komponentin 996 486 adam, 2 komponentin 930 myńnan astam adam aldy) baılanysty.
Qalada ınfektsııanyń taralýyna jol bermeý boıynsha shekteý sharalaryn saqtaýdy baqylaý kúsheıtilgen ári jalǵasýda. Almatyda 40 monıtorıng toby jumys isteıdi, jyl basynan beri 44 myńnan astam nysan tekserildi, karantın sharalaryn buzǵan 4297 nysan anyqtaldy, karantındi jıi buzatyndarǵa qatysty sotqa 78 materıal berildi.
Qala mektepterinde qaýipsizdikti saqtaý jáne aýrýdy juqtyrýdyń aldyn alý erekshe baqylaýda. Tıisti kontıngentten muǵalimderdiń 100%-y ekpe aldy. «Ashyq» zamanaýı tehnologııasyn belsendi engize otyryp, «Salaýatty mektepter» baǵdarlamasy iske asyrylýda, sonyń arqasynda mektep oqýshylary arasynda aýrýdyń tómendegeni baıqalady.
Degenmen, jyl sońyna deıin dertti juqtyrýdyń boljamyn eskere otyryp ári birqatar basqa elderde aýrýdy juqtyrý deńgeıiniń ósýi saldarynan 2022 jylǵy mamyrǵa deıin ónimniń 68 ataýynan turatyn dárilik preparattar men medıtsınalyq buıymdardyń qajetti qoryn qamtamasyz etý, tósek-oryndardy daıyndaý boıynsha ázirlik jumystary júrgizildi. 375 dárihanada, qala qoımalarynda suranysqa ıe preparattardyń ár túri boıynsha kúndelikti ótkizý kólemi men qaldyqtaryna monıtorıng júrgiziledi.
Baıandamalardy tyńdaǵan Eraly Toǵjanov qaladaǵy epıdemıologııalyq ahýaldyń turaqtanǵanyn – 24 qazannan bastap megapolıs «sary» aımaqta ekenin, sońǵy 2 aptada aýyrýdyń 1,5 esege, ólim-jitimniń 1,6 esege tómendegenin atap ótti. Premer-Mınıstrdiń orynbasary qala ákimdiginiń basshylyǵyna COVID-19 ben maýsymdyq tumaýǵa qarsy vaktsınalaýdy ulǵaıtýdy tapsyrdy. JOO rektorlarynyń nazary stýdentterdi vaktsınalaý jónindegi jumysty kúsheıtýge aýdaryldy, óıtkeni búginde megapolıstiń JOO-da stýdentterdi vaktsınalaý 57% quraıdy.
Bul másele qaýipsiz bilim berý protsesin qamtamasyz etý úshin mańyzdy. Keńes jumysyn qorytyndylaǵan vıtse-premer E. Toǵjanov Almaty qalasy elimizdiń eń iri megapolısi ekenin, sondyqtan densaýlyq saqtaý júıesin damytý, epıdemıologııalyq ahýal, halyqty vaktsınalaý máseleleri jergilikti atqarýshy organdardyń basshylarynyń qatań baqylaýynda bolýy tıis ekenin atap ótti.
