Almatyda epıdemıolog mamandar jetispeıdi - Jandarbek Bekshın
ALMATY. QazAqparat - Almatyda epıdemıologter jetkiliksiz. Bunyń negizgi sebebin qalanyń bas sanıtarlyq dárigeri Jandarbek Bekshın brıfıng barysynda aıtyp berdi, dep habarlaıdy QazAqparat tilshisi.
«Qalalyq taýarlar men qyzmetterdiń sapasy men qaýipsizdigin baqylaý departamentiniń shtattyq biriligine sáıkes, 88 epıdemıolog bolýy kerek. Qazir 80 maman bar. Bireý dekrettik demalysta, 15-ke jýyq qyzmetker oblysta turady. Karantınge baılanysty Almatyǵa kire almaıdy. Qalany epıdemıologtarmen tolyq qamtamasyz etý úshin bizge shamamen 40 qosymsha birlik qajet. Árıne, biz zeınetkerlikke shyqqan áriptesterimizdi tarta almaımyz, óıtkeni 63 jastan asqan adamdar vırýs oshaǵynda jumys isteı almaıdy «, - deıdi Jandarbek Bekshın.
Sonymen qatar, ol epıdemıolog mamandardy daıarlaý máselesi óte mańyzdy ekenin atap ótti.
«Maman tapshylyǵynyń sebebi – jalaqynyń tómendigi. Joǵary bilikti, tájirıbesi mol epıdemıologtiń eńbekaqysy 100-130 myń teńge aralyǵynda. Al, jas mamanyń jalaqysy 70-80 myń teńge. Árıne, áleýmettik kómek bolmaǵan soń kóptegen jastar epıdemıolog mamandyǵyn tańdamaıdy. Qazirgi ýaqytta bizde mamandandyrylǵan epıdemıologterdi daıarlaý máselesi ótkir tur, óıtkeni olar densaýlyq saqtaý fakýltetterinde az saǵattyq júktemede daıyndalady», - dep tolyqtyrdy Jandarbek Bekshın.
Sondyqtan, ol osy kadrlardyń biliktiligin arttyrý úshin ǵylymı ortalyqtardy qalpyna keltirý qajet ekendigin tilge tıek etti.
