Almatyda «Eńlikgúl-2011» teatr óneriniń kásibı syılyǵynyń ıegerleri belgili boldy
ALMATY. 29 naýryz. QazAqparat /Názıra Eleýhan/ - Almatyda M. Áýezov atyndaǵy Qazaq memlekettik akademııalyq drama teatrynda respýblıkalyq «Eńlikgúl» teatr óneriniń kásibı syılyǵynyń marapattaý rásimi bolyp ótti.
Esterińizge sala ketsek, atalmysh syılyq 2010 jyly Qazaqstan Teatr qaıratkerleri odaǵynyń muryndyq bolýymen qazaq teatr tarıhynda tuńǵysh ret taǵaıyndalyp, óziniń alǵashqy ıegerlerin tapqan bolatyn.
"Bul kún "teatr azapkerleri úshin", elimizdiń teatrlarynda qyzmet etetin 3480-nen astam qyzmetkerler úshin -úlken mereke. Bul "azapker" degen sózdi men jaqsy maǵynada aıtyp turmyn. Uly ónerge eńbek etý, qyzmet etý azapty jumys, ári "úlken qudiretti" jumys. Sondyqtan, biz bul sharany 27 naýryz- teatr kúnine oraı, atap ótýdiń bir amaly retinde ádeıi oılap tapqanbyz. Bizdiń endigi maqsatymyz, bul sharany halyqaralyq deńgeıge kóterý. Elimizdegi 52 memlekettik jáne 10-nan astam jeke menshik teatrlarda qyzmet jasap júrgen barshańyzdy merekelerińizben quttyqtaımyn!", - dedi atalmysh sharanyń uıymdastyrýshysy, Qazaqstan Teatr qaıratkerleri odaǵynyń tóraǵasy, belgili sahna qaıratkeri, tanymal akter Tuńǵyshbaı Jamanqulov.
Onyń aıtýynsha, syılyqtyń maqsaty men mindeti - halyqqa mádenı-rýhanı qyzmet etip, Qazaqstan sahna óneriniń damýyna zor úles qosyp júrgen ártister qaýymynyń arasynan úzdikterdi tańdap, marapattaý, sonymen qatar, sahnagerler ortasyndaǵy básekelestik rýhty arttyryp, teatr óneriniń órkendeýine yqpal jasaý bolyp tabylady.
Synshy, mádenıettanýshy Álııa Bópejanovanyń aıtýynsha bul shara teatr ártisteri men qyzmetkerleri úshin úlken rýhanı mereke. ""Eńlikgúl" syılyǵy -álemdegi belgili Nobel, Oskar, Reseıdegi "Nıka" syılyǵy sııaqty, óziniń sımvoly bar mártebeli syılyq. Óziniń áriptesteriniń baǵa beretin kásibı syılyǵy",-dep atap ótti ol.
Ótken, 2010 jyly "Eńlikgúl" syılyǵy 4 atalym boıynsha berilse, bıyl syılyq 7 atalym boıynsha berildi.
Ádil-qazylar alqasynyń ortaq sheshimi boıynsha, bıyl eń úzdik jyl aktery ataǵyna M. Lermontov atyndaǵy akademııalyq orys drama teatry aktery Vıtalıı Bagrıantsev ıe boldy. Al "Jyl aktrısasy" bolyp 30 jyl Jambyl oblystyq drama teatr sahnasynda óner kórsetip júrgen aktrısa Gúlshat Qypshaqova atandy. Dál osy teatrdyń rejıssery Qýandyq Qasymov "Eń úzdik, jyl rejısseri" ataǵyna ıe boldy. "Jyldyń operalyq, balettik partııasy" atalymynyń jeńimpazy Abaı atyndaǵy opera jáne balet teatrynyń solısti Bolat Esimhanov laıyq dep tabyldy. Al, "Jyldyń úzdik teatr sýretshisi" ataǵyna Aqtóbe oblystyq "Alaqaı" teatrynyń bas sýretshisi Ásııa Qurmanalına ıe boldy. "Teatr ónerin damytýǵa qosqan úlesi úshin" syılyǵy Qaraǵandy mýzykalyq komedııa teatrynda 50 jyldan astam ýaqyt osy ordada qyzmet jasap júrgen akter Vladımır Sýhovqa berildi. Bıyl tuńǵysh ret taǵaıyndalǵan "Qýyrshaq teatrynyń jyl ónerpazy" syılyǵy Mańǵystaý oblystyq Qýyrshaq teatrynyń aktery Erjan Begashevqa buıyrdy.
Basty syılyqtardan bólek, "Jyl dramatýrgy", "Jyldyń ozyq teatrtanýshylyq maqalasy", "Jyldyń ozyq teatr menedjeri", "Jyldyń ozyq mýzykalyq kórkemdeýshisi", "Jyldyń ozyq jaryq berýshisi" atalymdary boıynsha bes yntalandyrý syılyqtary tabystaldy.
"Eńlikgúl" syılyǵynyń barlyq ıegerleri arnaıy dıplomdarmen, sonymen qatar, sharanyń Bas demeýshisi "QazMunaıGaz" kompanııasynyń aqshalaı jáne baǵaly syılyqtarymen marapattaldy.
Keshte qazaq estradasynyń juldyzdary óner kórsetti.
