Almatyda «Eńlik» stýdentter teatry quryldy (FOTO)
ALMATY. QazAqparat - Almatyda Qazaq memlekettik qyzdar pedagogıkalyq ýnıversıtetiniń Qazaq fılologııasy jáne álem tilderi fakýlteti janynan tuńǵysh ret «Eńlik» stýdentter teatry quryldy. Jańa óner ordasynyń shymyldyǵy jas aqyn, rejısser Bekzat Smadııardyń «Bult qoı mynaý jylaǵan» dramalyq qoıylymymen ashyldy.
Ýnıversıtettiń baspasóz qyzmetiniń habarlaýynsha, teatrdy ashý ıdeıasyn fakýltet dekany Altynaı Tymbolova usynǵan.
Óz sózinde osy teatrdyń kórkemdik jetekshisi, pedagogıka ǵylymdarynyń kandıdaty, professor Bereke Jumaqaeva jańa teatrdyń jastarǵa bereri mol ekendigin basa aıtty.
«Stýdentterdiń ónerge degen talaby zor. Shyǵarmashylyq - bul, úlken kúsh qoı. Jastardyń ózi súısingen ispen shuǵyldanýy olardyń ómirge degen qyzyǵýshylyǵy men qulshynysyn arttyra túsedi jáne ıgi isterge jolbasshy bolady», - dedi ol.
Qoıylymnyń tusaýkeserinde qatysqan ýnıversıtet rektory Dınar Nóketaeva ónerli jastarǵa rızashylyǵyn bildirdi.
«Stýdentterdiń ónerge degen qulshynysyn arttyrý - ádemilikke, ásemdikke baýlý, rýhanııat álemine sýsyndatý bolyp tabylady. Teatrdyń «Eńlik» dep atalýynyń ózinde tereń mán-mazmun bar. «Eńlikgúl» qanshalyqty názik gúl bolsa da, sonshalyqty tasty jaryp shyǵatyn qaısar bolǵandyqtan, ony keıde «Erlik gúli» dep te ataıdy», - dedi D. Nóketaeva.
Kásibı akterlar bolmasa da stýdentter óz rólderin berile somdady. 
