Almatyda energojabdyqtardy jóndeýge 4 mlrd teńge jumsalmaq
ALMATY. QazAqparat - Almatyda energojabdyqtardy jóndeýge 4 mlrd teńge jumsalmaq, dep habarlaıdy QazAqparat tilshisi.
«AlES» AQ aldaǵy jylytý maýsymyna daıyndyq barysynda energetıkalyq jabdyqtardy josparly jóndeýden ótkizýge, qazandyqtardy jetkilikti otyn qorymen qamtamasyz etýge tehnıkalyq sharalar júrgizip jatyr.
Atap aıtqanda, «KEGOK» AQ operatory belgilegen JES-1, JES-2, JES-3, Batys Jylý kesheni, Qapshaǵaı GES-i, Kaskada GES-i nysandarynda 69 jabdyq, 20 energetıkalyq qazandyq, 13 týrboagregat, 19 sý jylytatyn qazandyq, 17 gıdroagregat jóndeýden ótedi.
«Energetıkalyq jabdyqty jóndeýden ótkizýge 4 mlrd teńge jumsalady. Qazirgi tańda qajetti jabdyqtar men bólshekterdi satyp alýǵa, qyzmet alýǵa kelisimsharttar jasalyp qoıǵan. Sondaı-aq, 59 jabdyq, ıaǵnı barlyq qordyń 86 paıyzy jóndeldi. Al qalǵan 6 jabdyq qazir jóndeýge jabyldy. Bul barlyq quraldardyń 9 paıyzyn quraıdy», - dedi «AlES» bas ınjeneri, basqarma tóraǵasynyń orynbasary Ǵazıı Ismýhambetov.
