Almatyda energııa tıimdiligi saıasatyn damytý taqyrybynda halyqaralyq semınar ótip jatyr
Semınarǵa ERSAQ-qa múshe Lıtva, Nıderlandy, Portýgalııa, Vengrııa, AQSh-tyń energetıka salasyn retteýshi organdarynyń, ÚEU-dyń ókilderi, sarapshylar qatysýda. «Jıynnyń basty maqsaty - energo únemdeý taqyrybynda tájrıbe almasý, jańa tásilderdi aıqyndaý, ákimshilik retteýge usynystar jasaý», -deıdi dóńgelek ústel moderatory Valdıs Lýkoshevıtsıýs.
Sondaı-aq jıyn barysynda Eýroodaq elderindegi energııa únemdeý, aýa-raıynyń ózgerýi, osy baǵyttaǵy kúrdeli problemalardyń aldyn-alý saıasaty talqylanýda. Bul rette Qazaqstan tarapynyń da is-sharalary sóz boldy. QR Úkimetiniń atalǵan baǵyttaǵy is-áreketi týraly jıyn qonaqtaryn QR Tabıǵı monopolııalardy retteý agenttiginiń tóraǵasy Nurlan Aldabergenov tanystyrdy. Onymen qatar «Samruq-Energo»AQ-y, «Qazaqmys» korporatsııasy» AQ-y, «Ortalyq-Azııalyq elektroenergııalyq korporatsııa» AQ-ynyń ókilderi óz kompanııalaryndaǵy energııa únemdeý saıasaty týraly sóz aldy.
«Qazaqstanda energııa únemdeý baǵyty boıynsha birqatar alǵa ilgerleýshilikke qol jetkizý qajet. Búgingi semınar bizdiń osy baǵytta júzege asyryp jatqan jumystarymyzǵa qosymsha baǵyt-baǵdar beredi»,- deıdi N.Aldabergenov. Semınar jumysy qyrkúıektiń 16-syna deıin jalǵasady.
QazAqparat anyqtamasy: Energetıkany retteý salasyndaǵy aımaqtyq qaýymdastyq (ERSAQ) 2000 jyly jeltoqsan aıynda energetıka salasynda retteýshi organdar arasynda tájirıbe almasý maqsatynda qurylǵan. Ortalyq Eýropa men Azııa, Taıaý Shyǵys, Afrıka memleketteri men AQSh-tyń 30-ǵa jýyq energetıka salasyn retteýshi organdary múshe.
