Almatyda eńbekaqysyn alýǵa kelgen áıeldi eki er adam uryp-soqqan
ALMATY. QazAqparat – Almatyda jumys ornyna eńbekaqysyn alýǵa kelgen áıeldi áriptesteri uryp-soqty. Bul týraly «NeMolchı.kz» qoǵamdyq qorynyń dırektory Dına Smaıylova Facebook-tegi paraqshasynda jazdy, dep habarlaıdy QazAqparat tilshisi.
Oqıǵa 29 jeltoqsan kúni keshke bolǵan.
«Úsh balasy bar áıel qurylys nysanynda jańa jylǵa qarsy eńbekaqy berip jatyr degen soń barǵan. Alaıda aldap shaqyryp alǵan jumysshylardyń biri ekeni belgili boldy. Ol mas kúıinde áıelge tıisip, jábir kórsetken. Jumys ornynda bolǵan eki aǵaıyndynyń biri syrtynan esikti jaýyp turǵan. Ol aıǵaılaı bastaǵan jáne kómekke shaqyrǵan. Osy áreketi úshin ony aıaýsyz soqqyǵa jyqqan», - dep jazdy Dına Smaıylova.
Jábirlenýshi týystaryna habarlasyp úlgergen, olar polıtsııa shaqyrǵan.
«Polıtsııa 16 mınýtta jetken, alaıda zardap shekken áıeldiń saý-tamtyǵy qalmaǵan. Polıtsııa bóliminde ol esinen tanyp qalǵan, jedel járdem shaqyrǵan, aýrýhanada ol taǵy da esinen tanǵan», - delingen jazbada.
Almaty polıtsııasy áıeldi aıaýsyz soqqyǵa jyǵyp, zorlamaq bolǵandarǵa qatysty túsinik berdi.
«Osy fakti boıynsha Túrksib aýdandyq polıtsııa basqarmasy QR Qylmystyq kodeksiniń 24-babynyń 3-bóligi jáne 120-baby, ıaǵnı «Zorlaý» boıynsha sotqa deıingi tergeý bastaldy, onyń aıasynda tergeýdiń obektıvtiligi, jan-jaqtylyǵy jáne tolyqqandyǵy qaǵıdattaryn saqtaı otyryp, tergeý áreketteri júrgizilýde», - dep habarlady Almaty qalalyq polıtsııa departamentiniń baspasóz qyzmeti.
