Almatyda eńbek mıgranttaryna jumys berýshilerdiń jadynamasynyń tanystyrylymy ótti
ALMATY. Maýsymnyń 4-i. QazAqparat /Názıra Eleýhan/ - Búgin Almatyda QR Jumys berýshiler konfederatsııasynda eńbek mıgranttaryn jumysqa tartý kezinde jumys berýshilerdiń este ustaýy qajet jadynamanyń tanystyrylymy ótti.
Jadynamany QR Jumys berýshiler konfederatsııasy Halyqaralyq eńbek uıymynyń jobasy aıasynda jasaǵan.
«Qazaqstanda ǵana emes, basqa elderde de nápaqa taýyp júrgen eńbek mıgranttary bar. Olardyń quqyǵy men jumysqa alý jóninde de arnaıy ereje bar, biraq olar kóp jaǵdaıda oryndalmaı keledi. Bizdiń Konfederatsııa osyǵan baılanysty, eske salý maqsatynda, halyqaralyq uıymdardyń usynysymen jumys berýshilerge arnalǵan eńbek mıgranttaryn tartý kezinde este ustaý jadynamasyn daıyndap shyǵardy. Munda jumys berýshige arnalǵan 7 talap jáne mıgranttardyń quqyǵyn qorǵaıtyn 7 tarmaq jazylǵan. Ár tarmaqta eki jaqtyń quqyqtary men jumysqa alý erejeleri aıqyn kórsetilgen. Bunymen qatar, bizdiń saıtta jalpy mıgratsııa boıynsha, jumys berýshilerge arnalǵan aqparattyq ortalyq jumys isteıdi. Saıttyń adresi www.krrk.kz . Munda eńbek mıgranttaryn qabyldaý kezinde jumys berýshi eskerýi tıis, qysqa da, nusqa erejeler berilgen. Sondaı-aq, jańa zańdyq jobany da osy saıttan qaraýǵa bolady. Aldaǵy ýaqytta, ózgertýlerdi de berip otyratyn bolamyz», dedi QR Jumys berýshiler konfederatsııasynyń atqarýshy dırektory Nadjat Qadyrov.
QR Jumys berýshiler konfederatsııasynyń Basqarma tóraǵasy Qadyr Baıkenovtyń aıtýynsha, bul jadynama, ásirese, jumys berýshilerge óte qajetti, ári mańyzdy. «Búgingi tańda elimizde eńbek mıgranttary da shet elden kelgen jumysshylar da óte kóp. Mıgranttardyń quqyqtarynyń qorǵalmaýymen qatar, olardy jumysqa alý men tartý kezinde kóptegen uıymdar men kompanııalarda zań buzýshylyqtar anyqtalýda. Biz sondyqtan, óz jumysymyz aıasynda jumys berýshiler óz jumystaryn zańdylyq turǵyda iske asyryp, bizdiń aqparattar men osy jadynamalarǵa nazar aýdaryp qyzmetterin júrgizse deımiz», dedi ol.
