Almatyda Enbek elektrondy bırjasyna 7 myńnan astam jumys berýshi tirkeldi
« Jyl basynan beri halyqty jumyspen qamtý ortalyǵy zeınetkerlik jasqa deıingi 500-den astam qala turǵynyna jáne 1 600-den astam múmkindigi shekteýli almatylyqtarǵa jumys tabýǵa kómektesti», - deıdi Dılıara Imanqulova.
Almaty qalasynyń halyqty jumyspen qamtý ortalyǵynyń basshysy qazirgi ýaqytta «Eńbek» baǵdarlamasy boıynsha nátıjeli jumyspen qamtýdy jáne kásipkerlikti damytýdy júzege asyryp jatqanyn aıtty.
Joba aıasynda «Jastar praktıkasy» ótkiziledi. Sonyń arqasynda JOO men kolledj túlekteri tańdaǵan mamandyǵy boıynsha alǵashqy jumys tájirıbesin alady.
« Qala ákimi Baqytjan Saǵyntaevtyń tapsyrmasy boıynsha jastar praktıkasyna qatysýshylardyń jalaqysy 25 AEK-ten 69 450 teńgeden 35 AEK-ke deıin ósti jáne salyq esebimen 102 myń teńge boldy. Bizdiń jumyspen qamtý ortalyǵynyń mamandary jastardyń jumysqa ornalasýy kezinde týyndaıtyn birqatar máselelerdi sheshýge kómektesedi, atap aıtqanda, qajetti jumys tájirıbesin alýǵa múmkindik beredi», – deıdi spıker.
Onyń aıtýynsha, qazirgi ýaqytta jumyssyzdar jumyspen qamtý ortalyǵyna kelmeı-aq Enbek elektrondyq bırjasyna júgine alatynyn aıtty.
Bul jumys izdeý men personaldy irikteýge járdemdesý úshin jumysqa ornalastyrý boıynsha biryńǵaı tsıfrlyq alań. Bos jumys oryndary men jumys izdeýshiler týraly aqparat kún saıyn jańartylyp otyrady.
«Bizdiń jumyspen qamtý ortalyǵynda jumys berýshilerdi qoldaý bólimi bar, onyń qyzmetkerleri Almaty qalasynyń jumys berýshilerimen baılanysta. Aıta ketsek, búginde «Enbek» bazasynda jumyssyzdardy jumysqa ornalastyrý boıynsha Almatydan 7 myńnan astam jumys berýshi tirkelgen. Jergilikti qurylys kompanııalary, saýda úıleri jumysqa qabyldaýdy belsendi júrgizýde», – dedi Dılıara Imanqulova.
Sondaı-aq Jumyspen qamtý ortalyǵynyń basshysy qala turǵyndarynyń zeınet jasyna deıingi jumyspen qamtylýy týraly aıtty.
Bıyl ortalyqqa júginýdiń arqasynda 55 pen 63 jas aralyǵyndaǵy 528 adam jumysqa ornalasty.
«Bizben yntymaqtasatyn jumys berýshiler zeınet jasyndaǵy azamattardy jumysqa qabyldaýǵa daıyn. Sondaı-aq «Eńbek» baǵdarlamasy boıynsha ýaqytsha jumys oryndaryna jumysqa ornalasýǵa múmkindik bar», – dedi ol.
Sonymen qatar spıker múmkindigi shekteýli jandardy jumysqa ornalastyrý týraly da málim etti.
«Bıyl biz múgedektigi bar 1 600-den astam adamdy jumysqa ornalastyrdyq, onyń ishinde 139 adam turaqty jumys oryndaryna, 347 adam úkimettik emes uıymdarǵa ýaqytsha jumys oryndaryna, taǵy 489 adam áleýmettik oryndarǵa ornalasty. Almatyda 10-ǵa jýyq uıym kórý qabileti buzylǵan adamdardy jumysqa qabyldaýǵa daıyn. Qalanyń barlyq uıymdaryna múmkindigi shekteýli jandardy jumysqa ornalastyrýǵa kvotalar bar ekenin eske salǵym keledi», – dedi Dılıara Imanqulova.
Almaty qalasynyń halyqty jumyspen qamtý ortalyǵynyń basshysy áıelderdi, ásirese kópbalaly analardy jumysqa ornalastyrýǵa úlken qoldaý kórsetip otyrǵanyn tilge tıek etti. Bıyl ortalyq 54 kópbalaly anaǵa jumys tapty, onyń 34-i AÁK alýshylar.
