Almatyda eń úzdik aýla sypyrýshy 200 myń teńgege ıe bolady
ALMATY. QazAqparat - Almatyda 1 mamyrda «Eń úzdik aýla sypyrýshy-2014» baıqaýy bastalady. Baıqaýdy Almaty qalasynyń ákimdigi men «Chısto po-almatınskı» qoǵamdyq uıymy jáne «Efes Kazahstan» kompanııasy uıymdastyrmaq.
Uıymdastyrýshylardyń aıtýynsha, bul shara qalanyń tazalyǵyn arttyryp, turǵyn-úı kommýnaldyq saladaǵy jumysshylardyń eńbegin yntalandyrýǵa baǵyttalǵan. Bul ataqqa qalanyń 7 aýdanynan 7 úmitker iriktelip alynady. Birinshi orynǵa ıe bolǵan tazalyq jarshysy - 200 myń teńge, ekinshi oryn ıesi - 150 myń teńge, úshinshi oryn ıesi 100 myń teńge alady. Baıqaýǵa ózine bekitilgen aımaqty muntazdaı taza ustaǵan kez-kelgen aýla sypyrýshy qatysa alady. Bıyl jeńimpazdardy marapattaý sharasy qala kúni qarsańynda, ıaǵnı qyrkúıek aıynda ótpek.
