Almatyda eń taza aýdandar Alataý men Áýezov - Tabıǵı resýrstar jáne tabıǵatty paıdalanýdy retteý basqarmasynyń bastyǵy
ALMATY. Shildeniń 20-sy. QazAqparat /Erlik Erjanuly/ - Almatyda aýaǵa taralatyn zııandy zattar sońǵy jyldary jylyna 18 paıyzǵa tómendep kele jatyr. Ony Tabıǵı resýrstar jáne tabıǵatty paıdalanýdy retteý basqarmasynyń bastyǵy Sultanbek Mákejanov búgin jartyjyldyqtyń qorytyndysyna arnalǵan qalalyq ákimdiktegi alqaly jıynda aıtty,
dep habarlaıdy QazAqparat.
"Almatynyń aı saıynǵy monıtorıng ortalyǵy" MKK derekteriniń qaraǵanda alǵashqy jartyjyldyqta Almatyda aýanyń lastaný ındeksi tómendep kele jatqany baıqalýda. Ol bıyl - 11,8 bolsa, byltyr - 13,8, al aldyńǵy jyly 13,8-di quraǵan bolatyn. Aýaǵa taralatyn zııandy zattardyń kólemi jyl saıyn 2600 tonnaǵa nemese 18 paıyzǵa azaıyp kele jatyr", deıdi S.Mákejanov. Tabıǵı resýrstar jáne tabıǵatty paıdalanýdy retteý basqarmasy bastyǵynyń aıtýynsha, Almatydaǵy eń taza aýdandar Alataý men Áýezov. Ondaǵy aýaǵa taralatyn zııandy zattardyń kólemi jylyna 0,1-0,9 myń tonnany quraıdy. Al eń kóp lastanǵan aýdan - Jetisý. Onda qaladaǵy barlyq zııandy zattardyń 55 paıyzy jınaqtalǵan nemese jylyna aýaǵa 6,5 myń tonna ýly zattar taralady.
"Ekonomıkalyq qyzmette zııandy zattardyń 60 paıyzy elektr energııasyn óndirý salasyna tıesili. Aýaǵa taralatyn ýly zattardy azaıtýda eń aldymen shań tutqysh jabdyqtardy ornatýdyń tıimdiligi zor. Ol 99,2 paıyzdy quraıdy. JEO-da ol zııandy zattardy jylyna 1500 tonnaǵa deıin azaıtady. Ekinshi, turǵyn úılerdi gazdandyrý. Ol lastanýdy 60 paıyzǵa azaıtady. Úshinshi, kásiporyndardyń jumysyn júıeli túrde baqylaý. Máselen alǵashqy jarty jylda 66 kásiporyn tekserilip, 9,1 mıllıon teńge aıyppul salyndy. Sondaı-aq 7,1 mıllıon teńgeniń qosymsha mindettemeleri júkteldi", deıdi Sultanbek Almasbekuly.
