Almatyda eń qaharly qys osydan 100 jyl buryn tirkelgen - Qazgıdromet
ALMATY. QazAqparat - Almatyda qańtar aıynda jaýyn jaýyp, sınoptıkter aýa raıynyń nelikten bulaısha qubylǵandyǵyn túsindirdi.
Bul týraly QazAqparat tilshisine «Qazgıdromet» RMK-nyń Almaty qalalyq bólimshesiniń ókilderi aıtty.
Keshe qalada keshkisin bastalǵan jaýyn búgin túske deıin jalǵasty.
Sınoptıkterdiń aıtýynsha, qańtardaǵy jylymyq qys mezgili úshin tosyn jaıt bolǵanymen, Almaty úshin asa tańqalarlyq jaǵdaı emes.
Sońǵy ýaqytta Almatynyń qańtarynda 0-den joǵary temperatýra jıi kezdesedi.
Eń joǵarǵy temperatýra 2002 jyly 7-qańtarda +18,2 bolyp tirkelgen edi.
Osydan 5 jyl buryn 2014 jyldyń 20-qańtarynda aýa temperatýrasy +12,3 gradýsqa deıin kóterildi. Jyl saıyn Almatyda qańtar aıynda aýa temperatýrasy keı kúnderi 0 gradýstan joǵaryny kórsetip turady.
Al eń tómengi temperatýra osydan 100 jyl buryn 1919 jyldyń 16-qańtarynda tirkeldi.
Ol kezde Almatyny -36,5 gradýs aıaz qysqan bolatyn.
Aıta ketý kerek, Almatyda 1850 jyldan bastap meteorologııalyq zertteý jumystary júrgizilip keledi.
1915 jyly Vernyı meteostansasy salynǵan soń baqylaýlar turaqty júrgizile bastady.
