Almatyda eń iri alma festıvali ótip jatyr
ALMATY. QazAqparat - Almatyda Qala kúni aıasynda «AlmaFest - 2017» dástúrli alma festıvali ótip jatyr, dep habarlaıdy QazAqparat tilshisi.
Atalǵan festıval jyl saıyn 200 myńnan astam almatylyqtar men qala qonaqtarynyń basyn qosady. Festıval barysynda «Almaty qalasynyń qurmetti azamaty» ataǵymen marapattaý saltanaty ótti. Saltanatty shara aıasynda «Almaty qalasynyń qurmetti azamaty» ataǵyna Qazaqstannyń memlekettik saıası qaıratkeri, elshi, ekonomıka ǵylymdarynyń doktory, elimizdiń voleıbol Federatsııasynyń prezıdenti Abyqaev Nurtaı Abyqaıuly, Qazaq SSR Mınısterler Keńesi tóraǵasynyń burynǵy orynbasary Jánibekov Sháńgereı Jánibekuly, Stalıngrad shaıqasyna qatysýshy, otstavkadaǵy polkovnık, aqyn, tabıǵatty saqtaý qoǵamynyń Almaty keńesiniń tóraǵasy Gırsh Leonıd ıÝzefovıch ıe boldy.
Almaty ákimi Baýyrjan Baıbek quttyqtaý sózinde Almatynyń mádenı, ǵylym- bilim, sport, qarjy jáne iskerlik ortalyq ekenin aıta kele, megapolıstiń ómir súrýge, jumys isteýge, demalýǵa jaıly meken bolǵanyn tilge tıek etti.
«Almatyda týǵan, ósip-óngen jáne osynda turatyn azamattar úshin bul tek janǵa jaıly qala ǵana emes. Bul - týǵan ólke, qashan da júregińniń tórinen erekshe oryn alatyn qasıetti meken. Elbasy Nursultan Ábishuly Nazarbaev «Bolashaqqa baǵdar: rýhanı jańǵyrý» atty maqalasynda «Patrıotızm týǵan jerińe degen súıispenshilikten bastalady», - dep atap ótken bolatyn. El Táýelsizdigi Almatyda jarııalandy, Ata Zańymyz, memlekettik rámizderimiz ben ulttyq valıýtamyz bizdiń qalamyzda bekitildi. Almaty máńgige Táýelsizdigimizdiń altyn besigi bolyp qala bermek. Megapolıste bıznes qarqyndy damyp, shahar ekonomıkasy 100 ese artty. Myńdaǵan jumys oryndary ashyldy. Elbasy aıtqandaı, «Almaty - Ortalyq Azııanyń injý-marjany», - dedi Baýyrjan Baıbek.
«ALMAFest-2017» - megapoıste osymen altynshy ret ótip jatqan aýqymdy mádenı-kóńildi shara. Saıabaq aýmaǵynda: «ALMA ART», «ALMA BAZAR», «ALMA OTBASY», «ALMA MASTER», «ALMA AUEN», «ALMA FASHION» ı «ALMA DRIVE» alańdary jumys isteýde. Munda ashyq aspan astynda degýstatsııa da ótip jatyr. Sharada 100 tonnadan astam alma satylady dep josparlanǵan.
Qolónershiler de túrli zergerlik buıymdar men aksessýarlardy, fýrnıtýralardy satýǵa shyǵardy. Aıta keterligi, Almaty oblysynyń tórt aýdanynan almanyń 20-dan asatyn túri ákelingen. Alma baǵasy bazar qunynan 20%-ǵa tómen.
Sondaı-aq, búgin «Qala kúni» aıasynda «Almaty Arenada» saǵat 17:00-de Evrazııalyq «EMA-2017» mýzyka syılyǵy ótedi. Munda otandyq jáne sheteldik estrada juldyzdary Qaırat Nurtas, Kental, Keshıý, Dıas Ablaev, Lýına, Ádemi, Dınara Sultan, Zırýza, Álisher Karımov, Rahat Lýkým, Rıngo jáne basqalary án shyrqaıdy. Festıval hedlaıneri Soso Pavlıashvılı men «Ninetty one» toby óner kórsetedi. 
Qala kúni merekesi «Astana» alańynda saǵat 21.00-de merekelik otshashýmen aıaqtalady.
Aıta keterligi, megapolıste Qala kúni merekesi aıasynda halyqaralyq «Star of Asia», «Kok-Tobe Opera» festıvalderi, kópmyńdyq Open Air «Gakku daýsy» jáne basqalary ótti. Qala kúnine júrginshige basymdyq beretin Panfılov, Jibek joly, Gogol, Qabanbaı batyr kósheleri qaıta jasaldy. Buryndary qaıta jańarǵan «Astana» alańy, Naýryzbaı aýdanynyń jańa ákimshilik- iskerlik ortalyǵy, qalanyń «Open Almaty» qoǵamdyq qabyldaý ortalyǵy jáne basqa obektiler ashylǵan edi.
