Almatyda emhana medqyzmetkerleri koronavırýsqa test alý ádistemelerin úırenedi
ALMATY. QazAqparat – Almaty qalasy ákiminiń orynbasary Erjan Babaqumarov pen qalanyń memlekettik bas sanıtarlyq dárigeri Jandarbek Bekshınmen COVID-19 zertteý júrgizetin alty zerthananyń basshylarymen vıdeokonferentsııa ótkizdi, dep habarlaıdy QazAqparat tilshisi.
Onlaın kezdesýde Memleket basshysynyń turǵyndardy koronavırýs ınfektsııasyna testileý kólemin arttyrý jónindegi tapsyrmalaryn oryndaý barysy qaraldy. Búginde Almatyda júrgiziletin zertteýler sanyn kúnine 2,5 myń testke deıin jetkizý mindeti tur. Sondaı-aq zerthanalardyń fýnktsııalaryn shekteý jáne zertteletin tulǵalar kontıngenti boıynsha mobıldi brıgadalardy bólý máseleleri talqylandy.
COVID-19 dıagnostıkasy boıynsha júrgizilgen jumystar týraly Almaty qalasynyń memlekettik bas sanıtarlyq dárigeri Jandarbek Bekshın baıandady. Búginde Almaty qalasynda PTR ádisimen koronavırýsty dıagnostıkalaýdy 6 zerthana júzege asyrady: Ulttyq saraptama ortalyǵy, sanıtarlyq-epıdemıologııalyq saraptama jáne monıtorıng ǵylymı-praktıkalyq ortalyǵy, M. Aıqymbaev atyndaǵy asa qaýipti ınfektsııalar ulttyq ǵylymı ortalyǵy, Ortalyq referens zerthana, sondaı-aq Qazaqstan-Koreı klınıkasy men «Olımp» KDZ.
Almatyda PTR ádisimen barlyǵy 42 myńnan astam test ótkizildi. Júrgiziletin zertteýler sanynyń kórsetkishi josparly túrde óskeni baıqalady. Test alýdyń maksımaldy qýattylyǵy kúnine 1 900 bolǵanyna qaramastan, sońǵy 7 kúnniń ishinde qalada ortasha eseppen 2 155 test júrgizildi. Test alý jumysyna barlyǵy 300 qyzmetker jumyldyrylǵan. Sonymen qatar, zerthanalarda nysandar men aýrý oshaqtary aımaǵyna barýǵa arnalǵan mobıldi brıgadalar da qyzmet etedi.
Almaty qalasy ákiminiń orynbasary Erjan Babaqumarov testilerdiń úzdiksiz alynyp, onyń qýattylyǵyn ulǵaıtý úshin zerthanalardy qajetti materıaldarmen qamtamasyz etý máselesin kóterdi.
«Testileý kólemin arttyrý jónindegi Memleket basshysy buıryǵyn oryndaý maqsatynda mamandar áleýetin arttyrý jáne qosymsha medıtsınalyq brıgadalar qurý qajet», – dep atap ótti E. Babaqumarov.
Almaty qalasy boıynsha Taýarlar men qyzmetterdiń sapasy men qaýipsizdigin baqylaý departamenti Qoǵamdyq densaýlyq saqtaý basqarmasymen birlese otyryp, alǵashqy medıtsınalyq-sanıtarlyq kómek kórsetý uıymdarynyń qyzmetkerlerin zertteý materıaldaryn alý ádistemelerine oqytý josparyn jasaý tapsyryldy.
