Almatyda emhana dárigerine qalaı jazylýǵa bolady

ALMATY. QazAqparat - Almatylyq №11 emhananyń jetekshisi Gúlmıra Aıtbaeva emhana dárigeriniń qabyldaýyna jazylý tártibi týraly aıtyp berdi, dep habarlaıdy QazAqparat tilshisi.

«Mamanǵa jazylmas buryn jalpy tájirıbe dárigerine (JTD) jazylý kerek. Búginde JTD-ge jazylý onlaın rejımde ótedi. Sonymen qatar qala turǵyndary emhananyń Call-ortalyǵyna qońyraý shalyp, telefon arqyly jazylý múmkindigi bar. Mamanǵa JTD-den joldamasy joq naýqastar, shuǵyl kómekke muqtaj bolǵan jaǵdaıda ǵana júgine alady», - dedi Gúlmıra Aıtbaeva.

Mundaı jaǵdaıǵa shuǵyl jaraqat, onyń ishinde oftalmologııalyq, otorınolarıngologııalyq, shuǵyl jáne josparly stomatologııalyq kómek kórsetý kezinde, dermatovenerologııalyq beıindegi aýrý kezinde, tirkelgen jeri boıynsha akýsher-gınekolog pen psıhologqa, onkologııalyq jáne gematologııalyq beıindegi aýrýǵa kúdik bolǵanda, dınamıkalyq baıqaý aýrýynyń beıini boıynsha, jastar densaýlyq ortalyǵyna, bir jaǵdaı sheńberinde beıindi mamanǵa qaıta qabyldaý kezinde, jyljymaly medıtsınalyq keshenge qyzmet kórsetý kezinde qabyldaýǵa mobıldi qosymsha nemese saıt arqyly jazylýǵa bolady.

Búinde patsıentterdiń 80 paıyzdan astamy onlaın jazylady. Kóp jaǵdaıda smartfon kómegimen jazylady.

Belgili bir dárigerdiń beıini boıynsha sozylmaly aýrýy bar jáne osy dárigerdiń dıspanserlik tobyna kiretin almatylyqtar ǵana mamanǵa óz betinshe jazyla alady.

«Mysaly, birinshi tıpti qant dıabetimen aýyratyn adamdar endokrınologtyń dıspanserlik tobyna kiredi. Mundaı patsıentterde endokrınologqa tıisti belgi qoıylady», - dedi spıker.