Almatyda emdeý mekemeleri biryńǵaı aqparattyq júıege biriktiriledi

Búgin QR Parlamenti Májilisiniń depýtattary Gúlmıra Isımbaeva, Serik Seıdýmanov, Gúlnar Ihsanova Almaty qalalyq kardıologııalyq ortalyǵynda boldy.

Halyq qalaýlylary qalalyq ortalyqtyń tsıfrlandyrý boıynsha jetken jetistikterine baǵa berdi.

 

Ortalyqtyń bas dárigeri Almas Qodasbaevtyń aıtýynsha, munda ashylǵaly beri 9900 koronarografııa jasalyp, 1500 adamǵa stent salynǵan. Kúnine ortalyqtyń dárigerleri 177 ret shaqyrtýǵa barady.

Halyq qalaýlylary kardıologııalyq ortalyqtyń qabyldaý bólimindegi ınnovatsııalyq jańalyqtarmen, tehnologııalarmen tanysty.

 

Delegatsııa alǵashqy kómek kórsetý, zerthana bóliminiń  tyń ózgeristerine baǵa berdi.

«Qazirgi birinshi kezekte sheshilýi tıis másele medıtsınalyq mekemelerdiń qalalyq biryńǵaı aqparattyq júıege biriktirilýi bolyp otyr. Bıyl osy júıe jasalsa, barlyq medıtsınalyq mekemelerdiń múmkindigi arta túsetin edi. Elbasynyń tapsyrmasy boıynsha «Tsıfrly Qazaqstan» baǵdarlamasy jasaldy. Búgin aýrýhanalarda sonyń jemisin kórip otyrmyz. Patsıent jedel járdemmen jetkenshe ol týraly bar maǵlumat osynda túsýi kerek, jol-jónekeı kólikte analız alynyp, kardıogramma túsip, tikeleı aýrýhanaǵa jiberilip, patsıent jetkenshe ony emdeý tásili aıqyn bolýy tıis. Munda ár mınýttyń quny qymbat», - dedi depýtat Gúlmıra Isınbaeva.

 

Onyń aıtýynsha, 2003 jyldan beri Qazaqstanda barlyq medıtsınalyq mekemelerdi biryńǵaı jelige biriktirýge 9 mlrd teńge jumsalǵan.

«Ol az aqsha emes. Endi osy bastalǵan isti sońyna deıin jetkizýimiz kerek», - dedi depýtat.

 

Óz kezeginde qalalyq Densaýlyq saqtaý basqarmasynyń basshysy Serikbol Mýsınovtyń aıtýynsha, qalanyń medıtsınalyq bazasyn qurý bıyl qolǵa alynbaq.

Bul joba  Almaty qalalyq  Smart city baǵdarlamasynyń bir bóligi retinde júzege asady. 

 

«Bul úshin qosymsha bıýdjet shyǵyny qajet emes dep sanaımyn. Bıyl jeltoqsanda qalalyq ákimdiktiń kómegimen 1 mlrd teńgege 6 myń kompıýter satylyp alyndy. Barlyq medıtsınalyq mekemeler 100 paıyzǵa qamtyldy. Osyǵan baılanysty memlekettik- jekeshelik áriptestik aıasynda bıyl aqparattyq júıeni tolyǵymen iske qosamyz», - dedi basqarma basshysy Serikbol Mýsınov.

 

Jańa júıe boıynsha naýqastar týraly maǵlumat der kezinde qajetti oryndarǵa jetkiziledi.