Almatyda Elordanyń damýyna úles qosqandar marapattalady
ALMATY. QazAqparat - Almaty ákimdiginiń bastamasymen Elordanyń qalyptasýy men damýyna úles qosqan laýreattardy «Astana - Ardaǵym merekelik syılyǵymen marapattaý rásimi ótedi, dep habarlaıdy QazAqparat tilshisi.
Marapattaý sharasy Respýblıka saraıynda 10 jeltoqsan kúni ótedi.
«Astana - Ardaǵym» syılyǵymen Almaty qalasynyń týmalary jáne Astananyń qalyptasýyna aıtarlyqtaı úles qosqan, Prezıdenttiń astanany kóshirý týraly sheshimine barynsha qoldaý kórsetken qaıratkerler marapattalady.
Almaty qalasynyń Mádenıet basqarmasy habarlaǵandaı, «Astana - Ardaǵym» syılyǵy 20 sanat boıynsha beriledi.
Atap aıtqandaı, olar - bilim men ǵylym, sáýlet pen qurylys, densaýlyq saqtaý, sport, óner, kınematografııa, jýrnalıstıka jáne ádebıet salalary boıynsha úles qosqandardyń eńbegi eskeriledi.
«Búgingi kúni Almaty qarjy jáne ekonomıkalyq magnıt retinde elimizdiń saıası ortalyǵy - Astanany úılesimdi tolyqtyrýda. Halyqaralyq tájirıbe kórsetkendeı, kúshti saıası ortalyq pen lıberaldy qalanyń kelisimi memlekettiń turaqty damýyna yqpal etedi. Memleket basshysynyń «Astananyń taǵdyry - eki ǵasyrdy artqa tastaǵan barsha qazaqstandyqtardyń taǵdyry. Bul zamanaýı memleketke aınalǵan, jahandyq qoǵamdastyq tanyǵan jáne qurmettegen, Uly joldan ótken táýelsiz Qazaqstannyń taǵdyry» degen sózderi jəne bar», - dep málim etti qalalyq ákimdiktegiler.
Nomınanttardy irikteý konkýrstyq komıssııanyń saıtynda ashyq daýys berýge bolady. Ol 9 jeltoqsanda Astana ýaqytymen 00:00-de aıaqtalady.
Eske salsaq, kelesi jyly Qazaqstan astanasy úshin mereıli jyl. Almatyda Astananyń 20 jyldyǵyn merekeleýge arnalǵan birqatar aýqymdy mádenı sharalar-kontsertter, festıvalder, kórmeler ótkizý josparlanǵan.
