Almatyda elimizge jáne álemge Azııa oıyndaryn taratatyn halyqaralyq aqparat ortalyǵy ashyldy

Ortalyq «Almaty Towers» kesheninde ornalasqan. Odan televızııalyq beınekórinister tikeleı búkil álemge taratylatyn bolady.

Ortalyqty ashqan qala basshysy, onyń mańyzdylyǵyn atap ótip: «Bul Ortalyq Almaty jáne el tarıhynda tuńǵysh ret ashylyp otyr. Ortalyq Azııa oıyndary ótetin Almaty jáne Astana qalalaryndaǵy 12 nysandarmen baılanysqan. Barlyq aqparat osynda kelip túsip, elimizge jáne álemge taralatyn bolady. Ortalyq zamanaýı tehnıkalarmen qamtylǵan. Mıllıondaǵan sport súıer qaýym Azııa oıyndarynyń barlyq kórsetilimderin bizdiń telearnalar arqyly tamashalaı alady. Bul jumysqa tanymal kompanııalar tartyldy, sol úshin de olarǵa alǵysymdy bildirgim keledi», - dedi.

7-qysqy Azııa oıyndaryn uıymdastyrý dırektsııasynyń vıtse-prezıdenti Maǵjan Qanǵojınniń aıtýynsha, ortalyq «Azıadanyń júregi» bolmaq. «IGBS kompanııasy sporttyq sharalardy basqarý men taratý ındýstrııasynda úlken tájirıbege ıe. Mysalǵa, olar 2002, 2006, 2010 jyldary fýtboldan álem chempıonatyn, sonymen qatar, Vankýverdegi olımpıadany taratqan bolatyn», - dedi.

Onyń aıtýynsha ,atalmysh kompanııanyń 700 mamany Azııa oıyndaryn taratýǵa quqyq alǵan barlyq elderge tikeleı taratýdy qamtamasyz etetin bolady. «Bul jerdi basty operatsııa jasaıtyn baza dep te aıtýǵa bolady. Sporttyń 11 túrinen ótetin sharalar, Azıadanyń ashylýy men jabylýy jaıyndaǵy aqparattar munda óńdeletin bolady», - dep atap ótti Maǵjan Qanǵojın.

Búginde 15-ke jýyq iri halyqaralyq kompanııa taratýǵa quqyq alǵan. «Onyń ishinde CCTV ( Qytaıdyń ortalyq telearnasy), MBC (Koreıa), «Ál-Jazıra» - iri arabtyq kompanııasy, reseılik «RTR-24» arnasy jáne basqa da telearnalar bar. Al, elimiz boıynsha «Qazaqstan» jáne «Habar» arnalary taratý quqyǵyna ıe boldy», - dedi M. Qanǵojın.