Almatyda elimizdiń eshbir jerinde kezdespeıtin sýburqaq ashyldy
ALMATY. Qazannyń 4-i. QazAqparat /Erbol Turymbetov/ - Almaty qalalyq Tabıǵı resýrstar jáne tabıǵatty paıdalanýdy retteý basqarmasy Ǵ. Músirepov atyndaǵy Jasóspirimder teatry men Respýblıka alańyndaǵy sýburqaqtardy qaıta jóndep, qala turǵyndaryna jańartylǵan nusqada usyndy.
Sýburqaqtardyń jumys jasaýyn qamtamasyz etý maqsatynda ótkizilgen memlekettik satyp alý jónindegi ashyq konkýrsty «Otaý Qurylys LTD» JShS jáne «Suńqar» JShS jeńip alǵan bolatyn. Tehnıkalyq erekshelikter talaptaryna sáıkes, Jasóspirimder teatry aldyndaǵy sýburqaqty «Otaý Qurylys LTD» JShS jóndeýden ótkizip, zamanaýı qondyrǵylarmen jabdyqtady. Jalpy atqarylyp jatqan jumystar «Jol kartasy» baǵdarlamasy aıasynda respýblıkalyq bıýdjet qarjysymen qaıta jańartyldy.
«Búgin biz Qazaqstannyń eshbir jerinde kezdespeıtin sýburqaqty ashyp otyrmyz. Mundaǵy sý ekranda sýretter men beınebaıandar kórsetý múmkindigi qarastyrylǵan. Sonymen birge, basqa elderdegideı án yrǵaǵymen bıleıtin sýburqaqtar da jasalǵan. Bulardyń bári quralyp kelgende, keremet kórinister jasap, qala kórkin arttyra túsedi», dedi Almaty qalasy Tabıǵı resýrstar jáne tabıǵatty paıdalanýdy retteý basqarmasy tóraǵasynyń orynbasary Marat Kesikbaev. Onyń aıtýynsha, keler jyly taǵy da 5 sýburqaq pen 2 ózen jáne 3 saıabaq qaıta kúrdeli jóndeýden ótkiziledi dep josparlanyp otyr.
Búginde, Almaty qalasy aýmaǵynda 125 jeke turǵan sýburqaq jáne sýburqaq toby bar. Onyń jartysynan kóbi kommýnaldyq menshikte bolsa, qalǵandary túrli zańdy tulǵalar men jeke tulǵalarǵa tıesili.
