Almatyda elimizdiń EQYU-ǵa tóraǵalyq etýi qurmetine arnalǵan kitap kórmesi ótedi
ALMATY. Sáýirdiń 8-i. QazAqparat /Názıra Eleýhan/ - Almatyda sáýir aıynyń 23-i kúni Ulttyq kitaphanada «Eýropaǵa jol - órkenıetke jol» atty kitap kórmesi ótedi,
dep habarlaıdy QazAqparat.
Ulttyq kitaphananyń uıymdastyrýymen ótetin kórme «Eýropaǵa jol» memlekettik baǵdarlamasyn júzege asyrý sheńberinde, el Prezıdenti N.Nazarbaevtyń Eýropadaǵy qaýipsizdik pen yntymaqtastyq uıymyna tóraǵalyq etýge kirisýine arnalǵan.
Kórmeniń maqsaty - kitaphana oqyrmandaryn: ǵalymdardy, stýdentterdi, ekonomıka, óndiris, bıznes menedjerlerin Eýropanyń jańa tehnıka men tehnologııa salasyndaǵy jáne rýhanı baı zııatkerlik aqparattyq resýrstarymen keńinen tanystyrý.
Atalmysh shara Abaı atyndaǵy Qazaqtyń memlekettik akademııalyq opera jáne balet teatry ártisteriniń kontsertimen aıaqtalady.
