Almatyda elimizdiń barlyq aımaqtarynyń jáne Ortalyq Azııa elderi sýretshileriniń kórmesi ashyldy
ALMATY. Qazannyń 13-i. QazAqparat /Názıra Eleýhan/ - Búgin Almatyda Tuńǵysh Prezıdent qorynda Qazaqstan sýretshileriniń art-sımpozıýmy aıasynda "Eýrazııa. Edilden Ertiske deıin. Qazirgi zamanǵy beıne" atty kórme ashyldy.
QR Sýretshiler odaǵynyń uıymdastyrýymen ashylǵan kórmege elimizdiń barlyq aımaqtarynan jáne Ortalyq Azııa elderi sýretshileriniń 100-den asa týyndylary qoıylǵan. Erteń plener aıasynda salǵan peızaj sýretteri qoıylmaq. Kórme sońynda "dóńgelek ústel" otyrysy ótip, eń úzdik dep tanylǵan 6 jumys marapattalatyn bolady.
"Bizdiń sýretshiler batyrlardy, salt-dástúrdi, qazaqtyń burynǵy ómirin beıneleýden asa almaı keledi. Sondyqtan bul kórmeniń maqsaty - sýretshiler eńbegin qoldaı otyra, olarǵa "nege búgingi Qazaqstandy, onyń ómirin, jasampaz turmysty beınelemeımiz, elimizdiń ósý, órkendeý jolyn nege kórsetpeımiz" degen oı tastaý", dedi QR Sýretshiler odaǵynyń tóraǵasy Ómirbek Baıtursyn. Onyń aıtýynsha, qazaqstandyq sýretshiler elimiz táýelsizdik alǵan jyldan beri tuńǵysh ret Túrikmenstan, Tájikstan, Ózbekstan, Qyrǵyzstan jáne Avstrııa elderiniń qylqalam sheberlerimen birge jumys isteýde.
Sımpozıýmǵa tuńǵysh ret qatysýshy túrikmen eliniń sýretshisi Berdi Charyevtiń aıtýynsha, mundaı sharalar óte qajet, ásirese ónerdiń damýy úshin. "Keńes ókimeti kezinde osy syndy sharalar kóp bolyp, jıi aralasyp turatynbyz, qazir ókinishke oraı, baılanysymyz azaıyp ketti. Mundaı sharalar bizderge tájirıbe jınaýǵa yqpal etip qana qoımaı, óz jetistikterimizdi, shyǵarmashylyǵymyzdy ári qaraı damytýǵa, jańa oı tabýǵa, baǵyt- baǵdardy aıqyndaýǵa kómektesedi", dedi ol. Onyń aıtýynsha, dástúr, batyrlar taqyrybyndaǵy sýretterden góri, búgingi zaman beınesin salýǵa kóshken jón.
Avstrııalyq sýretshi Volfgang Valkenshteınniń aıtýynsha, Avstrııada "dástúrli" sýretterdi kóp eshkim salmaıdy. "Eń jas sýretshi birden zaman talabyna saı, búgingi ómirdi kórsetetin sýretter salady. Menińshe, osy ǵasyrdyń sýretshileri búgingi zamandy kóp beınelegenderi durys", dedi ol. Onyń aıtýynsha, qazaqstandyq sýretshilerdiń kásibıligi joǵary, biraq olardyń taqyryptary kóbine tarıh, salt-dástúr jaıynda. "Durysy, keıinge qaraılaýǵa múmkindik bermeıtin búgingi ýaqyttan qalmaý kerek", dedi Volfgang Valkenshteın.
Kórmege elimizdiń 13 qalasynan otyzdan asa sýretshiler men Almaty qalasynan 35 sýretshi qatysýda.
