Almatyda elimizdgi alǵashqy «Keremet» stýdentterge qyzmet kórsetý ortalyǵy ashyldy

Halyqqa qyzmet kórsetý ortalyqtarynyń jumys isteý qaǵıdatyn ustanǵan bul mekeme, stýdentterge «Bir tereze» júıesi boıynsha qyzmet kórsetedi.

Ortalyqtyń ashylý saltanatyna QR Bilim jáne ǵylym mınıstri Aslan Sárinjipov, Almaty qalasynyń ákimi Ahmetjan Esimov jáne basqa da joǵary laýazymdy tulǵalar qatysty.

«Bul ortalyq Qazaqstanda ǵana emes, búkil TMD elderi boıynsha tuńǵysh ret ashylyp otyr. Munda stýdentter ózderine qajetti barlyq qujattardy, anyqtamalardy rásimdeı alady. Jumys oryndarynda is-tájirıbeden, mashyqtaný merzimderinen ótý máseleleri, sonymen qatar zańdyq jáne kásibı suraqtar boıynsha jan-jaqty aqyl-keńester ala alady. Ortalyqty óz aldyna «Smart-sıtı» ıaǵnı, «Aqyldy qala» deýge de bolady. Ol 7300 sharshy metr jerdi alyp jatyr. Bes sektordan turady. Olar: oqý sektory, medıtsınalyq ortalyq, oıyn-saýyq ortalyǵy, ákimshilik sektor jáne áleýmettik sektor. Atap óter bolsam, munda kınoteatr, notarıýs, bank, áýe jáne temir jol kassalary, sýpermarket, sulýlyq salony, kir jýatyn oryndar jáne kitap dúkenderi jumys isteıdi. Ortalyq 20 myńǵa jýyq stýdent pen 5 myńdaı oqytýshy quramyna qyzmet kórsetýge laıyqtalǵan. Aldaǵy qyrkúıek aıyna qaraı tolyqtaı paıdalanýǵa beriledi. Eger bolashaqta ortalyqtyń qýaty ulǵaıyp jatsa, qaladaǵy basqa da joǵary oqý oryndarynyń stýdentterine qyzmet kórsetetin bolamyz. Bul ortalyq - rektorymyzdyń ıdeıasy!» - dedi óz sózinde osy "Keremet" stýdentterge qyzmet kórsetý ortalyǵynyń dırektory Saıran Baıandınova.

Bir aıta ketetin jaıt, ortalyq ishinde zamanaýı medıtsınalyq quraldarmen jabdyqtalǵan jańa medıtsınalyq dıagnostıkalyq ortalyq bar. Bul Ońtústik Koreıadaǵy Seýl ulttyq ýnıversıtetimen aradaǵy strategııalyq kelisimshart aıasynda júzege asqan joba. Munda stýdentterge tegin, oqytýshylyq quramǵa belgili bir jeńildikpen qyzmet kórsetiledi.