Almatyda elimiz boıynsha eń úlken Nazarbaev Zııatkerlik mektebi ashyldy (FOTO)
ALMATY. QazAqparat- Búgin Almaty qalasy Naýryzbaı aýdanynyń Qalqaman-2 yqshamaýdanynda hımııa-bıologııa baǵytynda oqytatyn Nazarbaev Zııatkerlik mektebi ashyldy. Bul - kólemi jaǵynan elimiz boıynsha eń úlken mektep.
Saltanatty ashylý rásimine Almaty qalasynyń jańa ákimi Baýyrjan Baıbek, «Nazarbaev Zııatkerlik mektepteri» derbes bilim berý uıymdary basqarmasynyń tóraıymy Kúlásh Shámshıddınova, belgili ǵalymdar, saıasat jáne qoǵam qaıratkerleri, pedagogter, oqýshylar jáne ata-analar qaýymy qatysty.
«Qurmettti oqýshylar, qadirli ata-analar! Men sizderdi Nazarbaev zııatkerlik mektebiniń ashylýymen shyn júrekten quttyqtaımyn. Qazaqta «El bolam deseń, besigińdi túze» degen jaqsy sóz bar. Sondyqtan da Elbasy Nursultan Nazarbaev táýelsizdiktiń alǵashqy jyldarynan bastap, bilim salasyna úlken mán berdi. «Bolashaq» baǵdarlamasyn qurdy. Sol baǵdarlama búginde óz jemisin berýde. Sondyqtan, Elbasymyz sekildi eshteńeden qoryqpaý kerek. Adamnyń qolynan kóp nárse keledi. Eń bastysy, shyn nıet, ynta-yqylas, bilim jáne jiger qajet. Esterińizde bolsyn, bilim - bul jaqsy. Biraq, tárbıesiz ol nátıje bermeıdi. ıAǵnı, Otanyn shyn súıgen patrıotty, mádenıetti, tárbıeli jáne bilimdi azamat bolyńyzdar. Elbasynyń saıasatyn ári qaraı jalǵastyratyn sizdersizder», - dedi óz sózinde Almaty qalasynyń ákimi Baýyrjan Baıbek.
Aıta ketelik, respýblıkamyzda Nazarbaev Zııatkerlik mektepteriniń ashylýy Elbasynyń bastamasymen «20 Zııatkerlik mektep» atty memlekettik baǵdarlama aıasynda júzege asyrylyp keledi. Alǵashqy fızıka-matematıka baǵytyndaǵy Nazarbaev Zııatkerlik mektebi 2009 jyly Astana qalasynda ashylǵan bolatyn. Qazirgi tańda elimizde 18 mektep jumys isteıdi. Al, búgingi - 19-shy mektep, ıaǵnı Almaty qalasyndaǵy hımııa-bıologııa baǵytynda oqytatyn Nazarbaev Zııatkerlik mektebi 960 oqýshyǵa arnalyp salynǵan. 9 bloktan turatyn mektepte sońǵy úlgidegi mektep jabdyqtarymen jabdyqtalǵan 70 oqý synyby men 25 zerthana ornalasqan. Dástúrli oqý qabınetteri men zerthanalardan basqa, ıntegratsııa, tehnıkalyq úlgileý, nano jáne bıotehnologııalar, robototehnıka, jeke jumys júrgizý jáne psıhologııalyq jeńildený kabınetteri bar. Fızıka, hımııa, bıologııa pánderiniń keńeıtilgen zerthanalary halyqaralyq zamanaýı talaptarǵa sáıkes jasalǵan. Al mektep telestýdııasy oqýshylardyń shyǵarmashylyq jáne ǵylymı qabiletterin damytýǵa múmkindik beredi.
Bul mekteptiń basqa zııatkerlik mektepterden taǵy bir aıyrmashylyǵy - munda ártúrli baǵyttaǵy tehnıkalyq úıirmeler júrgiziletin tehnotorııa zerthanalary bar. Mektep ornalasqan aýdanda turatyn oqýshylar atalǵan úıirmelerge kelip qatysýlaryna bolady.
Mektep jańa kompıýterlik júıelermen, oqýshylarǵa tıimdi bilim berýmen qatar, muǵalimge de oqý úrdisin tıimdi basqarýǵa qajetti zamanaýı kompıýterlik tehnıkalar, ınteraktıvti elektrondy taqtalar, joǵary jyldamdyqty ınternet, ınnovatsııalyq baǵdarlamalardyń quraldary qoıylǵan mýltımedııalyq kabınettermen jabdyqtalǵan.
