Almatyda elektrondy jol belgisi ornatyldy
ALMATY. QazAqparat – Almaty qalasynda qozǵalysty joldaǵy jaǵdaıǵa baılanysty rettep otyrýǵa qabiletti elektrondy jol belgisi ornatyldy. Qalalyq polıtsııa departamentinde onyń mán-jaıy týraly baıandap berdi, dep habarlaıdy QazAqparat.
Belgi týraly vıdeo Instagram paraqshada paıda boldy.
«Dýmandaǵy baǵdarshamda elektrondy jol belgisi ornatyldy. Keptelis jaǵdaıynda bul belgi tek týra kórsetip otyrsa, keptelis bolmaǵanda týra jáne sol jaqqa kórsetedi», - deıdi kadrdyń ar jaǵyndaǵy daýys.
Polıtsııa departamentiniń baspasóz qyzmetiniń naqtylaýynsha, Almaty qalasy PD ákimshilik polıtsııa basqarmasy baǵdarlamalar ákimshisimen (Almaty qalasynyń mobıldi basqarmasy) birlesip 9 sáýir kúni Talǵar tas joly men Han táńiri kósheleriniń qıylysynda (Dýman shaǵynaýdanynan shyǵar jol) aýyspaly aqparat beretin elektrondy jol belgisin (4.1.1 «Týra qozǵalys» jáne 4.1.5 «Týra nemese sol jaqqa qozǵalys») iske qosty.
«Atalǵan qozǵalys eýrostandartqa sáıkes, SMD LED-tehnologııalardy qoldaný arqyly oryndaldy jáne jol belgileriniń túrli-tústi sýretin óte anyq etip kórsetedi, bul óz kezeginde júrgizýshilerdiń belgini qabyldaý kezinde qate jibermeýine septigin tıgizedi. Jol belgisiniń qajetti sýreti táýlik ýaqyty boıynsha (baǵdarlama boıynsha) arnaıy elektrondyq blokpen nemese kólikter sanyna baılanysty shyǵarylady. Aýyspaly aqparaty bar jol belgisiniń jumys ýaqyty – tańǵy saǵat 6:00-dan 11-ge deıin, 4.1.1 «Týra qozǵalys» jáne 4.1.5 «Týra nemese sol jaqqa qozǵalys» belgileriniń jumys ýaqyty – saǵat 11:00-denn saǵat 6:00-ǵa deıin», delingen habarlamada.
