Almatyda elektrondy jol belgileri qoıylýda

ALMATY. QazAqparat - Bıyl Almatynyń «Dýman» yqsham aýdanynyń shyǵaberisinde ózgerip turatyn aqparaty bar 4.1.1 «Týra qozǵalys» jáne 4.1.5 «Alǵa nemese solǵa qozǵalys» elektrondy jol belgisi paıdalanýǵa berilgen. Bul týraly qalalyq polıtsııa departamentiniń Ákimshilik polıtsııasynda eske saldy, dep habarlaıdy QazAqparat tilshisi.

«Bul jol belgisi QR ST 1412-2017 jol qozǵalysyn retteýdiń tehnıkalyq quralyna sáıkes jasalǵan. Aýyspaly aqparaty bar kóp pozıtsııaly basqarylatyn jol belgilerin (taqtalardy) paıdalanýǵa ruqsat etiledi. Olardy paıdalaný sharttary osy standarttyń talaptaryna sáıkes bolýy kerek. Sonymen qatar, belgi EN12966 eýropalyq standartyna sáıkes, SMD LED tehnologııalaryn qoldaný arqyly jasalǵan jáne jol belgileriniń túrli-tústi keskinin joǵary ajyratymdylyqpen kórsetýge múmkindik beredi. Jol belgisiniń kerekti beınesi táýlik ýaqytyna sáıkes (baǵdarlama boıynsha) nemese jol qozǵalysy jaǵdaıyna sáıkes ATQB Basqarý ortalyǵynan qashyqtan arnaıy elektrondy blokpen kórsetiledi, – dedi Almaty qalalyq PD Ákimshilik polıtsııa basqarmasynyń bastyǵy Nurlan Amanbek.
Sondaı-aq, ol jol qozǵalysyn retteýdiń bul jańa tehnıkalyq quralyn qalanyń jol jelisine keńinen engizý, kúrdeli kólik toraptarynda basqarýdyń ıkemdi (ıntellektýaldy) rejımderiniń jumysyn qamtamasyz etý úshin ornatylǵanyn atap ótti.