Almatyda elektrli samokatty paıdalanýdy úıretetin mektep ashyldy
Elektrli samokattardy jalǵa berý qyzmetin usynatyn kompanııanyń syrtqy baılanystar bóliminiń basshysy Danııl Kaptsanyń aıtýynsha, qala turǵyndary samokattardy durys júrgizýdi jáne turaqqa qoıýdy úırenedi. Sondaı-aq jeke qozǵalys qurylǵysyn paıdalaný erejelerimen tanysady.
«Búgingi kúni álemde elektrli samokat – jańa kólik túri bolyp sanalady. Ol barlyq iri megapolısterde bar. Adamdar bul kólikke úırenip, ony qoldana da bilýi qajet. Avtomektep – qarapaıym, biraq óte mańyzdy qaýipsizdik erejelerin úıretedi. Biz bul mektepte jol júrý erejesin kez kelgen adamǵa túsindiremiz», - deıdi Danııl Kaptsan.
Elektrli samokattardy jalǵa berý qyzmetin usynatyn kompanııalar oqytýdy apta saıyn qalanyń ár bóliginde uıymdastyratyn bolady. Atalǵan sharalar ákimdik pen komanııalar arasynda jasalǵan memorandým aıasynda júzege asyrylady.
Oqytý qorytyndysy boıynsha qoldanýshylar test tapsyryp, tegin mınýttar alýǵa jáne jyldamdyqty 25 km/saǵ jetkizýge múmkindik beretin promo-kod ala alady. Jol qozǵalysyna qatysýshylardyń qaýipsizdigin qamtamasyz etý maqsatynda oqytýdan ótpegen qoldanýshylar úshin maksımaldy jyldamdyq 20 km/saǵ deıin shekteledi.
Danııl Kaptsan ózi ókildik etetin kompanııa halyqaralyq ekenin aıtty. Ol álemniń 45 qalasynda jumys isteıdi.
«Bizdiń kompanııa qyzmet kórsetetin barlyq qalada qatelikter qaıtalanady. Olardyń kópshiligi, ókinishke oraı, qaıǵyly jaǵdaıǵa ákelip jatady. Birinshi ereje – samokatqa eki adamǵa minýge bolmaıdy. Ol velosıped sııaqty, belgili bir salmaqqa arnalǵan. Ekinshi jıi kezdesetin qatelik – paıdalanýshynyń samokatpen joldy kesip ótýi. Joldy jaıaý kesip ótý kerek. Jaıaý júrginshiler ótkelinde samokattan túsken abzal. Bul paıdalanýshynyń ómiri men densaýlyǵy úshin óte mańyzdy», - dedi ol.
Sondaı-aq Danııl Kaptsan elektrli samokat mektebi maýsymnyń sońyna deıin – kún sýytqanǵa deıin jumys isteıtinin aıtty. Almatyda – jeltoqsan, elordada – qarasha aıyna deıin.
